Бага насны таван хүүхэд зам тээврийн ослын улмаас бэртжээ
Замын цагдаагийн албаны ЖШУХ-т өчигдөр нийт 237 дуудлага, мэдээ ирсэн байна.
Үүнээс зам тээврийн ослын 164 дуудлага бүртгэгдсэн бөгөөд осол, хэргийн улмаас нэг хүний амь нас хохирч, 15 хүн хөнгөн, хүндэвтэр байдлаар гэмтсэн аж. Мөн бага насны таван хүүхэд зам тээврийн ослын улмаас бэртсэн талаар мэдээллээ.
Тухайлбал, Хан-Уул дүүргийн нутаг Морингийн давааны замд машин онхолдож, зорчигч 18 настай И, 19 настай Ч, 19 настай Н нарын гурван хүн гэмтсэн байна.
Мөн Сонгинохайрхан дүүрэгт Beiben маркийн ачааны автомашинаас ачиж явсан контейнер T.Pruis-10, T.Pruis-11 маркийн автомашинууд дээр унасан хэрэг гарчээ. Ослын улмаас зорчигч 36 настай М, 36 настай Б, гурван настай Б, долоон сартай Г нарын таван хүн гэмтэж ГССҮТ-д эмчлүүлж байна. Хэргийг үргэлжлүүлэн шалгаж байгаа талаар Замын цагдаагйн албанаас мэдээлэв. Түүнчлэн Ланд крузейр маркийн автомашинаас зорчигч 53 настай О унаж амиа алдсан харамсалтай хэрэг гарчээ.
Амралт, зугаалгын улиралд Улаанбаатар хотоос гадагш чиглэсэн тээврийн хэрэгслийн тоо нэмэгддэгтэй холбоотой орон нутгийн замд гарч байгаа зам тээврийн осол ихээр нэмэгдэж байгааг Замын цагдаагийн албанаас анхаарууллаа.
Тодруулбал, 2017 оны эхний хагас жилийн байдлаар Улсын хэмжээнд ТХХАБАЖЭГХ 771 бүтгэгдэж, зам тээврийн ослоор 181 хүний амь нас хохирсны 149 нь буюу 82 хувь нь орон нутгийн замд, зөвхөн зургадугаар сард гэхэд орон нутгийн замд 23 хүн зам тээврийн ослоор амь нас нь хохироод байна. Энэ нь өмнөх оны мөн үетэй харьцуулахад амь нас нь хохирсон хүний тоо 30.7 хувиар өссөн үзүүлэлттэй байна.
Иймд баяр наадмын болон бүх нийтийн амралтын өдрүүдэд орон нутагт гарч буй зам тээврийн осол, хэргийг бууруулах, урьдчилан сэргийлэх зорилгоор алба хаагчид өндөржүүлсэн бэлэн байдалд 24 цагийн турш хяналт шалгалт хийж ажилласанаар орон нутагт амь нас нь хохирсон хүний тоо 40 орчим хувиар буурсан эерэг үзүүлэлттэй байна.
Тиймээс Замын цагдаагийн албанаас нэн ялангуяа амралтын улирал, ой, тахилга, баяр наадмуудтай холбоотойгоор Улаанбаатар хотоос гадагш автомашинтай зорчих дотоодын аялагчдын тоо үлэмж нэмэгдэж орон нутагт хөдөлгөөний ачаалал нэмэгдэх төлөв ажиглагдаж байгаа тул орон нутгийн замд хөдөлгөөнд оролцохдоо архи согтууруулах ундааны зүйл хэрэглэснээс үүдэн гарах хор хохиролыг хүн бүр ухамсарлаж, хөдөлгөөний аюулгүй байдлаа хангаж хөдөлгөөнд оролцохыг зөвлөж байна.
МЭДЭЭНИЙ СЭТГЭГДЭЛ
ХОЛБООТОЙ МЭДЭЭ
Веб сайтад агуулагдсан мэдээлэл зохиогчийн эрхийн хуулиар хамгаалагдсан тул зөвшөөрөлгүй хуулбарлах хориотой.
Copyright © MMINFO.MN All Rights Reserved. Powered by HUREEMEDIA.
