“Яг түүн шиг” шоуны найм дахь дугаарын дараа өрнөсөн мэтгэлцээн олны анхаарлыг татсан. Энэ дугаарын ялагчаар “Хар сарнай” хамтлагийг дууриасан жүжигчин Ариунцэцэг түрүүлсэн. Гэвч төгөлдөр хуурч С.Алимаа буюу Амиг дэлхийн супер од, реппер Эминемыг гайхалтай дууриасан учир түрүүлэх ёстой байсан гэж үзэх хүмүүс маш олон байгаа. Гэвч оролцогчид гурван оноогоо өгөхдөө чанар харж биш өөрсдийнхөө сэтгэгдлийг түрүүнд тавьсан нь түүнийг гонсойход хүргэсэн талаар Ами фэйсбүүк хуудсаараа дамжуулж илэрхийлж байсан.

Тэгвэл тэрбээр саяхан нэгэн сайтад өгсөн ярилцлагадаа ч азгүй байсан талаараа ярьжээ. Тэрбээр “Яг үнэнийг хэлэхэд надад гашуун ялагдал байсан. Гэхдээ мэдээж хэн нэг нь түрүүлдэг жамтай. Нөгөөтэйгүүр бүгд хөдөлмөрлөж байна. Ариука ч “Хар сарнай” хамтлагийн Амараа ахын дүрийг гаргахын тулд яаж хөдөлмөрлөж, яаж хичээсэн билээ. Бүгд өөрсдийн оногдсон дүрдээ маш их сэтгэл гаргаж, хөдөлмөрлөж байгааг бид өөрсдөө харж байгаа. Бүгд нүдэн дээр турж байна.  Гэхдээ энэ асуудалд “Боловсрол” телевиз болон шүүгч нарыг ямар нэгэн байдлаар муу хэлэхгүй, гомдоллохгүй. Телевизийнхэн маань анхнаасаа бидэнд үзэгчдээ, шоу нэвтрүүлгээ хүндлээд, оноогоо маш шударга өгөөрэй гэдэг хүсэлт тавьж байсан.

 Тиймээс би анх үнэхээр сайн байсан, таалагдсан үзүүлбэртээ л оноогоо өгдөг байв. Ямар нэгэн найзын найраа надад байгаагүй. Түүндээ баярлаж, ялагч болсон хүнтэй хамт босоод л баярладаг байсан. Харин тэр өдөр өрсөлдөгчид маань оноогоо өгч эхлэх тэр мөчид надад яагаад ч юм их эвгүй санагдсан. Өөрийн эрхгүй нэг хар бараан юм нөмрөөд ирсэн. Гэхдээ хэнд оноогоо өгөх нь тэр хүний л эрх. Өнөөдөр тэр хүнд тэр үзүүлбэр таалагдсан байж болох юм. Тэгэхээр түүний араас гомдолтой байна гэж яримааргүй байна. Одоо есдүгээр шатныхаа бэлтгэлд илүү шартай орсон байгаа. Тэр өдрийн од тэнгэр Ариукагийн талд байж, би азгүй байлаа. Ариукадаа баяр хүргэх нь зүйтэй юм” хэмээн ярьжээ.