"Эрдэнэт” үйлдвэрийн ТУЗ-ийг 100 хувь төрөөс бүрдүүлэх шийдвэр гараад хэдхэн хонож байгаа билээ. Тэгвэл өчигдөр төрийн төлөөлөл болж томилогдсон ТУЗ-ийн гишүүд Оюуны өмч, улсын бүртгэлийн ерөнхий газарт хандаж, “Эрдэнэт” үйлдвэрийн өмчлөлийн гэрчилгээг төрийн нэр дээр гаргуулсан аж. Энэ асуудлыг эсэргүүцэн 49 хувийг эзэмшигч тал буюу "Монголын зэс" корпорациас мэдээлэл хийлээ. Мэдээллийг тус корпорацийн Гүйцэтгэх захирал Ц.Пүрэвтүвшин болон ТУЗ-ийн гишүүдийн төлөөлөл болох М.Мөнхбаатар, Да.Ганболд нар өгсөн юм. Мөн төрөөс томилогдсон гэх ТУЗ-ийн гишүүд ч хуралдахаар ирээд байсан бөгөөд сэтгүүлчдэд хоёр тал хоёулаа зэрэгцэж суугаад мэдээлэл өгөв.

Ц.Пүрэвтүвшин: Өмчлөх эрхэд хууль бусаар халдсан үйлдэл гаргалаа

 /"Монгол зэс" корпорацийн Гүйцэтгэх захирал/

-Өнгөрсөн долоо хоногт Засгийн газрын хэрэг эрхлэх газраас "Эрдэнэт үйлдвэр" болон “Монголросцветмет” ХХК-ийн ТУЗ-ийг 100 хувь төрөөс бүрдүүлэх чиглэлийг Төрийн өмчийн хороонд өгсөн. Энэ чиглэлийн хүрээнд Төрийн өмчийн хороо өнгөрсөн баасан гарагт хуралдаад ТУЗ-ийг томилоод зогсохгүй, манай компанийн өмчид байгаа 49 хувийн хувьцааг төрийн өмчид бүртгэн авч, улмаар өмчлөх эрхэд хууль бусаар халдсан үйлдэл гаргалаа. Энэ талаар манай компани Улсын бүртгэлийн ерөнхий газарт мэдэгдэл өгсөн. Илт хууль бус өмчлөлийг бүртгэхгүй байхыг хүссэн. Бид арай ч ингээд дээрэм хийж авчих юм гэж бодоогүй. Гэтэл яг энэ өрөөнд  "Эрдэнэт” үйлдвэрийн төрөөс 100 хувь томилогдсон гэх долоон гишүүн хуралдах гээд ирчихсэн байна. Төрийн өмчийн бодлого зохицуулалтын хорооны төлөөлөгч бас ТУЗ-ийн удирдамжийг аваад ирсэн байна. Дөнгөж сая нөгөө өрөөнд "Эрдэнэт” 100 хувь төрийн мэдэлд орсон гэрчилгээ нь гарсан гэдгийг харуулж, албан бусаар бидэнд мэдэгдлээ. Уг нь бид албан ёсны байр суурийг Төрийн өмчийн хороо, ЗГХЭГ гээд бусад эрх бүхий байгууллагаас авахыг хүссэн юм. Гэвч өнөөдрийн байдлаар бидэнд ирсэн бичиг баримт, мэдээлэл алга байна. Ийм асуудал болно гэж ойлгоогүй. Арай ч бас үгүй байлгүй дээ. Эрх зүйт тогтолцоотой ардчилсан улсад хүний өмчийг зүгээр хэлэхгүй байж байгаад, аваад, бүртгээд явчихдаг асуудал байдаг гэж үнэхээр төсөөлөөгүй. Гэтэл үнэхээр ийм юм болчихлоо. Бид холбогдох шүүх байгууллагад нь хандаж, хуулийн дагуу хараат бус шүүхээр шийдвэрлүүлж, эрх ашгаа хамгаалуулна.

М.Мөнхбаатар: Энэ бол төрийн дээрэм

/“Монгол зэс” корпорацийн ТУЗ-ийн дарга/

-Өнөөдөр болж байгаа үйл явдал бол товчхондоо дээрэм. Дээрэм, дээрэмдээ төрийн дээрэм болж байна. Хувьцаа эзэмшигч хууль ёсны өмчлөгчид нь хэлэхгүйгээр хулгайч шиг хуралдаж, хувийн өмчийг нь булааж авлаа. Бүр төрийн механизмаа ашиглаж Улсын бүртгэл хийлгэлээ. Та бүхэн энэ бүгдийн гэрч болж байна. Үндсэн хууль батлагдсан цагаас хойш Монгол Улсад гарч байгаа анхны төрийн дээрэм. Энэ дээрмийн хохирогч нь бид боллоо. Магадгүй энэ дээрэм манайхаар эхлээд цаашдаа бусад компанийн, хувь хүний өмчид төр халдах бүрэн боломжийг нээж өгч байна гэхэд хилсдэхгүй. Засгийн газарт манай асуудлаар ажиллах ажлын хэсэг байгуулагдсан гэдгийг хүртэл хэвлэлээс уншсан. Өөрөөр хэлбэл, бидэнд албан ёсны нэг ч бичиг баримт ирээгүй. Хүний хууль ёсны өмчийг ингэж булааж болдог юм уу. Бид ямар нийгэмд амьдарч байгаа билээ. Уг нь эрх зүйт тогтолцоотой, хууль цаазтай улсад амьдарч байгаа биз дээ. Гэтэл хуулиа хэрэгжүүлэх ёстой төрийн байгууллагууд нь өөрсдөө хууль бус үйл ажиллагаа явуулж байна. Дөнгөж сая Төрийн өмчийн бодлого зохицуулалтын газрын төлөөлөл нь ТУЗ-д "Эрдэнэт” үйлдвэр 100 хувь төрийн өмч болсон гэсэн Улсын гэрчилгээ авч ирж өглөө. Энэ бол хүнийг яаж дээрэлхэж, буруутгаж болдгийг, хувийн өмчийг төр нь хэрхэн булааж авдаг вэ гэдгийг олон улсад тунхаглалаа.

БИД “ЭРДЭНЭТ”-ИЙН 49 ХУВИЙГ ХУУЛИЙН ДАГУУ АВСАН

...Тэдний мэдээллийн дараа төрийн төлөөлөл болсон албаны хүмүүс дараах тайлбарыг өглөө.

У.Бямбасүрэн: Засгийн газар, УИХ-ын  шийдвэрийг л биелүүлж байна

/ Эрдэнэт” үйлдвэрийн ТУЗ-ийн дарга/

-“Эрдэнэт” үйлдвэрийн 49 хувийг ОХУ-аас “Монгол зэс” корпораци өнгөрсөн оны зургадугаар сард худалдаж авсан. Худалдаж авсан үйл явц нь Монгол Улсын холбогдох хууль тогтоол зөрчсөн байна гэсэн УИХ-ын тогтоол гарчихсан. УИХ-ын тогтоолыг хэрэгжүүлэх ажлын хэсэг ч байгуулагдсан. “Эрдэнэт” үйлдвэрийн хувьцаа эзэмшигчдийн хурлыг өнгөрсөн долоо хоногт хийж, “Монгол зэс” корпорацийн ТУЗ-ийн гишүүдийг чөлөөлсөн байгаа. Ингээд ТУЗ-ийг 100 хувь төрийн төлөөлөл болгосон. Хувьцаа эзэмшигчдийн хурал бол хуулийн дагуу явагдсан. Энэ үйлдвэрийн хувьцаа эзэмшигч этгээд бол Төрийн өмчийн хороо юм. Тус хороо өнгөрсөн баасан гарагт хуралдаж, “Эрдэнэт” үйлдвэрийн өмчлөлийн гэрчилгээг 100 хувь төрийн өмч болгох шийдвэр гаргасан байгаа. Өнөөдөр Оюуны өмч, улсын бүртгэлийн ерөнхий газарт бүртгүүлж, шинээр гэрчилгээг нь авлаа. Үйлдвэрийг төр өөрийн өмчид авснаар найман даргатай болно гэж “Монгол зэс” корпорацийн төлөөллүүд ярьж байна. Тийм зүйл байхгүй. Цаашид “Эрдэнэт” үйлдвэрт бүтцийн өөрчлөлт хийгдэнэ. Ажлын байрандаа тэнцэхгүй байгаа, компанийн үйл ажиллагаанд саад болж байгаа хүмүүст бүтцийн өөрчлөлт хийнэ. Энэ үйл ажиллагааг л төрийн дээрэм гээд байгаа бололтой. Бид бол Монгол Улсын Засгийн газар, УИХ-ын гаргасан шийдвэрийг л биелүүлж байна. Гэхдээ хуулийн хүрээнд.

Д.Дэмбэрэл: Монголчууд хоорондоо учраа олчих байлгүй дээ

/Эрдэнэт” үйлдвэрийн ТУЗ-ийн гишүүн/

-“Эрдэнэт”-ийн 49 хувийг дээрэмдүүлээд өмчөө алдчихсан юм уу. Би тэгж бодохгүй байна. Үүнийг чинь ярилцаж тооцоо хийнэ гэсэн биз дээ. Дээрэм, тонуул хийлээ гэж ярих нь илүүц юм. Хувьцаа эзэмшигчийн хурал хуулийн дагуу явсан эсэхийг Төрийн өмчийн хороо мэдэх ёстой. “Эрдэнэт”-ийн ажилчдыг халах солих вий гэх болгоомжлол гарах шиг боллоо. Бид тэр ажилчдыг өөрчлөх, цалинг нь хасах зүйл хийхгүй. Харин “Эрдэнэт”-д бүтцийн өөрчлөлт удирдлагын төвшинд хийгдэх бол байж болох асуудал. Одоо ТУЗ шинээр бүрдээд дараа дараагийн асуудлыг шийднэ. Гэхдээ тийм олон дарга томилохгүй. Цаашдаа хууль зөрчсөн элдэв үйлдэл байвал тэр гажуудлыг засах зөндөө боломж бий. 49 хувийн талтай хэлэлцээ хийчихээд гэрчилгээгээ гаргуулах ёстой байсан гэлээ. Байр нь солигдсон асуудлын тухайд хоорондоо учраа олчих байлгүй дээ. Ямар гадаад улс орнуудтай ярьж байгаа биш.