НИТХ-ын Ажлын алба, Нийслэлийн Засаг даргын Тамгын газар, Захирагчийн ажлын албаны албан хаагчид нийслэлийн гудамж талбайн хогийг цэвэрлэжээ.

Энэ үеэр Нийслэлийн Засаг даргын Тамгын газрын Хяналт шинжилгээ үнэлгээний хэлтсийн дарга Х.Гантулга “Улаанбаатар хотын Ерөнхий менежерийн тушаалаар жил бүрийн хавар нийслэлийнхэн их цэвэрлэгээ хийгддэг. Үүний дагуу нийслэлийн бүх дүүрэг өөр өөрийн захирамж гаргаж, дүүргийн харьяа байгууллагууд дүүргийн нутаг дэвсгэр дэх далан суваг, гэр хороолол, жалга гууны хогийг цэвэрлэж байна.

Нийслэлийн Засаг даргын Тамгын газар, Иргэдийн төлөөлөгчдийн хурлын Ажлын албаны албан хаагчид Централ таураас Багшийн дээдийн уулзвар хүртэлх талбай, саадын хогийг цэвэрлэлээ. Захирагчийн ажлын албаны албан хаагчид хонхтой цэцэрлэгийн хогийг цэвэрлэж байна. Нийслэлийн хэмжээнд нийслэлийн нутгийн захиргааны 84 байгууллага цэвэрлэгээнд оролцож байна” гэсэн юм.

Мөн төрийн бус байгууллагууд их цэвэрлэгээнд оролцсон аж. Түүнчлэн  байгууллагуудын цэвэрлэгээнд оролцож байгаа байдалд иргэний хяналт тавих юм байна.