Туркийн Гадаад хэргийн сайд Мевлют Чавушоглу болон Гэр бүл нийгмийн бодлогын сайд  Фатма Бетул Саян Каяа нарын Нидерландад хийх айлчлалыг цуцалсантай холбоотойгоор  Анкара болон Амстердамын хоорондын харилцаа хурцдаад буй.

Тодруулбал, Туркийн Гадаад хэргийн сайд Мевлют Чавушоглу, Гэр бүл нийгмийн бодлогын сайд Фатма Бетул Саян Каяа нарын Засгийн газрын гишүүд ирэх дөрөвдүгээр сарын 16-нд явагдах бүх нийтийн санал асуулгаас урьтан Нидерландад айлчилж, тэнд ажиллаж амьдарч буй турк иргэдтэй уулзан, өнөөгийн Ерөнхийлөгч Ресеп Тайип Эрдоганы эрх мэдлийг өргөтгөхийг дэмжихийг уриалах зорилготой байсан аж.

Гэвч Нидерландын тал аюулгүй байдлын үүднээс дээрх сайдуудыг хүлээн авахаас татгалзсан байна.

Гадаад хэргийн сайдыг хүлээн авахаас татгалзаж буйгаа тус улсын Засгийн газраас мэдэгдсэн бол Германд айлчлаад буцахдаа Нидерландыг дайрч, тэндээ уулзалт хийхээр төлөвлөсөн байсан Гэр бүл, нийгмийн бодлогын сайдыг ч мөн хүлээн аваагүй аж. Энэ явдалд бухимдсан сайд нутагтаа буцаж ирмэгцээ “Үл хүндлэл үзүүлсэн. Засгийн газрын эмэгтэй гишүүнийг энэ мэт байдлаар буцаах нь дипломат ёсонд нийцэхгүй”  хэмээн бухимдсаны зэрэгцээ “Дипломат паспорттой Засгийн газрын гишүүн Туркийн хилд байрлах Консулын газарт очиж, ард иргэдтэйгээ уулзалт хийхийн тулд заавал Нидерландаас зөвшөөрөл авах шаардлагагүй” гэжээ. Т

уркийн Ерөнхий сайд Йылдырым Акбулут ч гэсэн Нидерландын Засгийн газарт хандан “Хамгийн ноцтой байдлаар хариу арга хэмжээ авна” гэдгээ мөн илэрхийлээд байгаа юм. Энэ мэтээр хоёр улсын дипломат харилцаа хурцдаж эхлээд байгаа бол өнгөрөгч даваа ням гарагт хэсэг иргэд Туркид байрлах Нидерландын Консулын газрын гадна эсэргүүцлийн цуглаан зохион байгуулсан байна.

Энэ үеэр уурлаж, бухимдсан нэг иргэн Консулын газрын гадна хашааг даван нэвтэрч,  барилгын орой дээр хатгасан Нидерландын  төрийн далбааг авч хаян,  оронд нь Туркийн далбааг мандуулсан тухай “AFP” агентлаг мэдээлжээ. Тус эмх замбараагүй байдалтай холбоотойгоор Консулын газрын үйл ажиллагаа түр хугацаагаар тасалдсан аж.  Үүнээс гадна Анкарад байрлах Нидерландын Элчин сайдын яамны гадна ч эсэргүүцлийн жагсаал зохион байгуулагдсан байна.

Ерөнхийлөгч Р.Эрдоган ч мөн өрнөсөн үйл явдалтай холбогдуулан өөрийн байр суурийг илэрхийлсэн байдаг. Тэрбээр  “Тэнд өнөө хэр нь нацизм оршин тогтнож байна” гэсэн бол түүний мэдэгдлийг Нидерландын тал үгүйсгэсэн юм. Тус улсын  Ерөнхий сайд Марк Рутте эрс буруушааж “энэ бол байж боломгүй хэрэг” гээд “Туркийн Засгийн газар манай улсаас уучлалт гуйх ёстой” гэсэн байна.  

Энэ долоо хоногт Нидерландад парламентын сонгууль явагдана. Харин ирэх сард Туркид Ерөнхий сайдын шууданчийн үүргийг халж, Ерөнхийлөгчийн эрх мэдлийг тэлэх нэмэлт өөрчлөлтийг Үндсэн хуульд оруулах эсэх талаарх бүх нийтийн санал асуулга зохион байгуулахаар төлөвлөсөн юм.  Үндсэн хуульд өөрчлөлт оруулах хуулийн төслийг эрх баригч “Шударга ёс, хөгжлийн нам” санаачилсан билээ.