Тээврийн хэрэгслийн гэрчилгээ шинэчлэгдсэн байна. Тодруулбал, олон улсын стандартад нийцсэн гэрчилгээтэй болж байгаа гэнэ. Уг гэрчилгээ нь одоо ашиглаж буй гэрчилгээтэй ижил загвартай боловч Монгол болон Англиар бичигдсэн байгаа аж. Холбогдох байгууллагаас иргэд, аж ахуйн нэгж байгууллагыг заавал гэрчилгээгээ соль гэсэн шаардлага тавихгүй бөгөөд тээврийн хэрэгслийг шинээр бүртгэх, шилжилт хөдөлгөөн хийх зэрэгт шинэчилсэн гэрчилгээг олгохоор зохион байгуулж байгаа гэдгийг санууллаа.

Тухайлбал, Азийн авто сүлжээний АН-4 чиглэлийн ерөнхий чиглэл болгож Монгол, ОХУ, БНХАУ гурван улсыг дамнасан авто замын дамжин өнгөрөх тээврийн эрх зүйн орчинг бүрдүүлэх нь зүйтэй гэх зөвлөмж олон улсын хоорондын хил дамнасан тээврийн семинарын үр дүнд гарсан билээ.

Харилцагч орнууд тус тусын дотоодын бэлтгэл ажлыг хангах, цаашид шийдвэрлэх бусад асуудлуудыг ажлын хэсэг байгуулан шийдвэрлэснээр тээврийн хэрэгслийн гэрчилгээ дэх мэдээллийг Монгол, Англи хэл дээр бичиж эхэлсэн аж.  Тээврийн хэрэгслийн гэрчилгээг шинэчилснээр дамжин өнгөрөх болон улс хоорондын тээвэрлэлт гүйцэтгэхэд үүсэх саад бэрхшээлийг арилгах, тээвэрлэлтийн баримт бичгийг олон улсын жишигт нийцүүлэх нэг алхам болсон ажээ.