Өнгөрсөн шөнө буюу 2016 оны арванэгдүгээр сарын 17-18-нд шилжих шөнө Улаанбаатар-Мандалговь, Өндөрдов-Зуунмод-Налайх чиглэлийн автозамд цас шууралгүй орж замын зорчих хэсэг дээр цас мөс тогтож хальтиргаа гулгаа үүсчээ. Харин Улаанбаатар-Өндөрхаан чиглэлийн автозамд өчигдөр оройноос орсон цасны улмаас хальтиргаа гулгаа их байгаа аж. Одоогийн байдлаар Ховд аймгийн Булган сумаас Цэцэг сумын хооронд Бага-Улаан даваа орчимд цас их орсны улмаас зам хаагдаж, зорчих боломжгүй болсон талаар албаны эх сурвалж мэдээллээ. 

 

Түүнчлэн Ховд аймаг, Алтайн нуруу, Бага улаан даваа, Бодончийн хавцал, Алтай, Үенч, Булганд их хэмжээний цас орж, цасны зузаан 40-50 см-т хүрч, зудын байдалтай байгаа аж. Мөн Төв, Өмнөговь аймгийн чиглэлд цас орж эхэлжээ. Хойд чиглэлд Баруунхараа, Бороогийн даваа гулгаатай. Завхан аймаг Ганцын болон Загастайн даваат орчим гулгаа үүссэн байдалтай байгаа тул нийт тээвэрчдийг хөдөө, орон нутагт зорчихдоо замын хөдөлгөөнд анхаарал болгоомжтой оролцож, иргэдийг  хувийн болон хууль бус тээврийн хэрэгслээр үйлчлүүлэхгүй байхыг Автотээврийн үндэсний төвөөс анхааруулж байна. 

 

Үүнээс гадна хөдөө, орон нутагт зорчих зайлшгүй шаардлагатай бол Автотээврийн үндэсний төвийн гэрээтэй аж ахуйн нэгжүүдийн даатгалтай, хяналттай, мэргэшсэн жолоочтой автобусаар үйлчлүүлэхийн зэрэгцээ Онцгой байдлын ерөнхий газрын шуурхай удирдлага, зарлан мэдээлэх төвийн 325726, 265726, 62263009 дугаарын утсанд холбогдож зөвлөгөө авахыг сануулж байна. Түүнчлэн зорчих чиглэлийн замын нөхцөл байдлын бодит мэдээллийг Зам тээврийн хөгжлийн төв ТӨҮГ-ын 70002413, 94722413, Автотээврийн үндэсний төвийн Хөдөлгөөний Хяналтын Хэлтсийн 70070012 дугаарын утаснаас авах боломжтой юм байна.