Монгол Улсын шинэ Үндсэн хууль батлагдсаны 25 жилийн ой 2017 оны нэгдүгээр сарын 13-нд тохиох юм. Тэгвэл Үндсэн хуулийн ойн хүрээнд улс орон даяар шатар сонирхогчдын улсын аварга шалгаруулах тэмцээнийг уламжлал ёсоор зохион байгуулах гэж байна. Энэ жилийн тэмцээн энэ сарын 19-нд орон даяар Монгол Улсын бүх сум, нийслэлийн дүүргүүдэд эхлэх юм. УИХ-ын дарга М.Энхболдын ивээл дор болох энэхүү тэмцээн оролцохыг хүссэн хүн бүхэнд нээлттэй юм.

Тэмцээн гурван үе шаттай болно. Энэ сарын 19-20-ны өдрүүдэд анхан шатны тэмцээн болох бол ирэх сарын 10-11-нд хагас шигшээ буюу аймаг, нийслэлийн аварга шалгаруулах тэмцээн болох юм. Тэгвэл шигшээ буюу улсын аварга шалгаруулах тэмцээн 2017 оны нэгдүгээр сарын 7-8-нд болох ажээ.

Шигшээ тэмцээн Төрийн ордонд болох бөгөөд хагас шигшээгээс шалгарсан шатарчид болон УИХ, Үндсэн хууль тогтоогчдын холбоо, УИХ-д ажлаа тайлагнадаг буюу Их хурлаас томилогддог байгууллагын шатарчид буюу нийт 120 орчим шатарчин өрсөлдөж, аваргаа тодруулах юм байна. Түрүүлсэн эрэгтэй, эмэгтэй шатарчдад Спортын дэд мастер цол олгох ажээ.