Номын хуудсыг эргүүлэх чимээ, шинэ номын үнэр, дуртай зохиолчтойгоо уулзах хүсэлтэй уншигчид гээд энэ бүхнийг номын баярын талбайд мэдрэх, харах боломжтой байлаа. Хэн нэгэн шинэ номын эрэлд явж, нөгөө нь хүүхдийнхээ сонирхсон номыг барин зогсоно. Харин зарим нь олон жилийн өмнө уншсан номоо дахин эрж, зохиолчдоос гарын үсэг авах гэж дугаарлаж байв.

НЗДТГ, “Номын соёлт ертөнц” ТББ хамтран 20 дахь жилдээ зохион байгуулж буй 40 дэх удаагийн Номын баяр буюу “Үндэсний бичиг соёл, номын өдрүүд-2026” энэ сарын 18-20-нд Ерөнхийлөгч У.Хүрэлсүхийн ивээл дор болж өндөрлөлөө.

Энэ удаагийн Номын баяр зөвхөн ном худалдаалах, зохиолчид уншигчидтай уулзах хүрээнээс өргөжиж, залуу хэвлэн нийтлэгчдийн гадаад хамтын ажиллагааг дэмжих, олон улсын хэвлэн нийтлэгчидтэй соёлын солилцоо хийхэд чиглэснээрээ онцлог байлаа.

Япон, БНСУ, БНХАУ, БНЭУ, Киргиз зэрэг 10 орны 30 гаруй зохиолч, хэвлэн нийтлэгч, номын соёлын төлөөлөл номын баярт хүрэлцэн ирж, гадаад оролцогчдын хэсэгт бүтээлээ танилцуулсан юм. Түүнчлэн байгууллага, компаниуд хоорондоо шууд уулзаж, хамтын ажиллагаа, түншлэл, бизнесийн боломжийн талаар ярилцах “Business-to-Business” уулзалтыг зохион байгуулжээ.

Номын баярын гурван өдрийн турш талбайд Зохиолчдын хэсэг, Гадаад  оролцогчдын гудамж, Хэвлэлийн газруудын тусгай гудамж, залуу хэвлэн нийтлэгчдийн “Indie Street”, Зурагт номын гудамж зэрэг олон хэсэг ажиллав.

Шинэ номын нээлт, зохиолч уншигчдын уулзалт, гарын үсэгтэй худалдаа, хүүхдийн номын уншлага, шатрын тэмцээн, урлагийн тоглолт гээд номын баярт ирсэн хүн бүрийн сонирхлыг татах зүйл цөөнгүй байлаа.

Уламжлал ёсоор “Мэргэн ном” цомыг гардуулж, номын соёлыг түгээн дэлгэрүүлэхэд хувь нэмрээ оруулсан зохиолч, уран бүтээлч, хэвлэн нийтлэгчдийг дэмжих “Улаанбаатар грант”-ыг олгосон юм. Энэ жилийн грантад дөрвөн бүтээл нэр дэвшжээ.

Номын баяр гэдэг зөвхөн ном худалдаж авах газар биш. Ном бүтээдэг, бичдэг, хэвлэдэг, борлуулдаг, уншдаг, хамгийн гол нь номыг дээдэлдэг хүмүүс нэг дор цуглаж, туршлага, санаа бодлоо хуваалцдаг соёлын томоохон уулзалт болжээ.

Хүүхдүүдэд түүхээ сонирхолтой байдлаар ойлгох боломжтой картыг гаргажээ

Энэ жилийн баярт 26 дахь удаагаа оролцож буй “Лантуун дохио” ТББ-ын үүсгэн байгуулагч Ч.Ганжавхлан номын баярын талаар сэтгэгдлээ хуваалцсан юм.

Тэрээр “Өнөөдөр их эмо өдөр байна. Жил бүр хүлээж, их ач холбогдол өгч оролцдог. Энэ намрын номын баярт дөрвөн төрлийн номтой ирлээ. Тэдгээрээс хамгийн сүүлд “Түлээ” номоо гаргасан. Түлээ бол мод. Мод бас цаас. Цаас бол ном” хэмээн ярив.

Харин Бурхан урлаач Д.Ухаанзаяа Номын баярт 10 дахь удаагаа оролцож байгаа бөгөөд Буддын шашны талаарх мэдлэг, ойлголтыг түгээн дэлгэрүүлэх зорилгоор оролцдог байна.

Түүний хэлснээр сүүлийн жилүүдэд залуус аливаа зүйлийг мухар сүсгээр бус, учир шалтгаан, шинжлэх ухааны талаас нь ойлгож мэдэхийг илүү сонирхох болжээ.

Тухайлбал, Цагаан Дарь эх бурхныг шүтэх л ёстой гэж бодохоос илүүтэй түүний үүсэл түүх, насны барцдыг хэрхэн амирлуулах, нас уртасгахтай холбоотой ойлголтуудыг номоос уншиж, учрыг нь ойлгохыг хүсдэг болсон аж.

“Залуучууд маань тарнийн утга агуулгыг судалж, уншдаг болсон байна” хэмээн тэр ярьсан юм.

Номын баярын үеэр зөвхөн ном төдийгүй хүүхдэд зориулсан түүх, танин мэдэхүйн бүтээлүүд ч олны анхаарлыг татаж байв.

Мөн Номын баяр дээр номын асруудаас гадна төрөл бүрийн тоглоом, хүмүүсийн сонирхолыг татах дуу хөгжим, картын асрууд гарчээ. Тэдгээрийн нэг Монголын их хаадын түүхийн картыг зорин ирсэн уншигчдад танилцуулж буй асраас зочиллоо.  Тус картаар бага насны хүүхдүүдэд түүх, өв соёлоо сонирхолтой хэлбэрээр түргэн сурах боломж олгохыг зорьжээ.

Монголын их хаадын түүхийн картыг санаачлагч Б.Булган “Бага насны хүүхдүүд картаар тоглох их дуртай. Тиймээс энэ насны хүүхдүүдэд монголын түүхийг хэрхэн сонирхолтойгоор ойлгуулах вэ гэдгээс төслийн санаа төрсөн. Жишээлбэл, Чингис хааны карт байлаа гэхэд төр барьсан хугацаа, цол хэргэм, өмнөх болон дараагийн хаан, Хамаг Монгол болон Их Монгол Улсыг байгуулан удирдаж байсан тухай мэдээллийг түлхүүр үгээр цээжлэх боломжтой байдлаар багтаасан” гэлээ .

Номууд 1000 төгрөгөөс эхлээд 1.6 сая төгрөгийн үнэтэй байлаа

Номын баярын бас нэгэн чухал зүйл нь номын үнэ, сонголт байдаг.

Хуучин номын худалдаа 1000 төгрөгөөс эхэлж байсан бол хүүхдийн номын үнэ 10 мянган төгрөгөөс эхэлж байлаа. Бусад номын үнэ төрөл, хэвлэл, агуулгаасаа хамааран харилцан адилгүй байна.

Харин өв соёл, түүхийн дурсгалтай холбоотой томоохон боть номуудын үнэ 1.6 сая орчим төгрөг хүрч байв. Ийнхүү номын баярын талбайд халаасанд нийцэх хямд номоос эхлээд цуглуулгын үнэ цэнтэй бүтээл хүртэл зэрэгцэн дэлгэгджээ. 

Хүн бүр авсан номынхоо эхний хуудсыг эргүүлэн унших тэр мөч номын баярын хамгийн үнэ цэнтэй хэсэг юм 

Ном сонирхогчдын хувьд Номын баяр бол хүссэн номоо нэг дороос олох боломж байдаг. Ялангуяа хүүхэд, залуусын хувьд хичээлийн даалгавараа хийхэд хэрэглэх, сонирхлоороо дуртай номоо сонгох боломж бүрддэг байна.

Энэ үеэр номын баяраар үйлчлүүлж буй сурагч Б.Итгэл “Жил бүр Номын баярт ирдэг. Манай багш авсан номоор маань номын тэмдэглэл хөтлүүлдэг. Номын баярын өдрүүдээр ном хямдралтай, олон төрлөөр, сонголт сайтай дэлгэгддэг нь хүссэн номоо авахад амар байдаг. Би “Монте-Кристо гүн”-г 10 мянган төгрөгөөр худалдаж авлаа” хэмээн ярьсан юм. 

Ийнхүү гурван өдрийн турш үргэлжилсэн Номын баяр амжилттай өндөрлөсөн юм.  Номын баярын хамгийн үнэ цэнтэй хэсэг нь талбай дээрх хөл хөдөлгөөн бус, хүн бүр гэртээ авч харьсан тэр нэгэн номыг нээж, эхний хуудсыг эргүүлэх мөч билээ.

Эх сурвалж: “Зууны мэдээ” сонин

2026 ОНЫ ЕСДҮГЭЭР САРЫН 21. ДАВАА ГАРАГ. № 177 (7919)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn