Монгол Улсын Сангийн сайд Б.Жавхлан цаг үеийн асуудлаар мэдээлэл хийлээ. Тэрбээр "Монгол Улсын Төрийн сангийн үйл ажиллагаа хэвийн явж байгаа. Төрийн бүх санхүүжилт хэвийн. Гадаад валютын нөөц таван тэрбум 874 сая ам.доллар байна. ОУВС саяхан Монголд ирж ажиллаад ямар ч эрсдэл алга гэж дүгнээд явсан.

Ирэх долоо хоногт ОУВС-гийн жилийн уулзалтад явна. Энэ уулзалтад П.Сайнзориг гишүүнийг хамт яваасай гэж хүсэж байна. Очоод Монгол Улсыг юу гэж дүгнэж байгааг сонсох хэрэгтэй. Монгол Улсын зээлжих зэрэглэлийг олон улсын үнэлгээний компаниуд В+ тогтвортой буюу өнгөрсөн жилийнхтэйгээ адил хэвийн байна гэж дүгнэсэн. Үүнийгээ олон улсад зарласан. Энэ бүх асуудлаар хэн дуртай нь гарч ирээд ярьж болохгүй. Энэ бол эмзэг асуудал.

Улс төрийн зорилгоор л ийм зүйл ярилаа гэж ойлгож байна. Төсвийн хэлэлцүүлэг өдийд эрчимтэй явагдаж байх ёстой. Ажлын хэсэг нь байгуулагдсан байх ёстой. Гэтэл аравдугаар сар гарчихаад байхад хэлэлцүүлэг хийхгүй байгаа нь харамсалтай" гэв.