Филиппин улсын төвийн бүс Себү арлын нутаг дэвсгэрт өчигдөр шөнө 22:00 цагт 6.9 магнитудын хүчтэй газар хөдөллөө. Газар хөдлөлтийн үеэр цунамийн давлагаа үүсэж болзошгүй гэдгийг сэрэмжлүүлж байсан ч аюулгүй өнгөрчээ.

Өнөөдөр өглөө цунамийн сэрэмжлүүлэг дохиог унтраасан байна. Газар хөдлөлтийн голомт нь Себү арлын Бого хотын зүүн хойшоо 17 км, Паломпон хотын баруун талд далайн гүний 10 км-т бүртгэгдсэн байна. Газар хөдлөх үед хамгийн их чичирхийлэл мэдэрч, гарз хохирол амссан газар нь Бого хот болжээ. Тус хот нь 90 000 оршин суугчтай. 6.9 магнитудын хүчтэй газар хөдөлсний дараа 5.0 болон түүнээс дээш магнитудын хүчтэй газар хөдлөлтийн дараах дөрвөн ч түлхэлт болжээ.

Филиппин улсын Газар хөдлөлт, галт уулын судалгааны газар Себү, Лейти, Билиран мужийн оршин суугчдыг далайн эргээс хол байхыг уриалсан байна. Газар хөдлөлтийн голомттой ойролцоох зарим газарт гэрэл цахилгаан тасарч, байшин барилга нуржээ. Мөн зам гүүр эвдэрсэн байна. Газар хөдлөлтийн улмаас 22 хүн амь эрсэдлээ. Бого хотод нийтийн орон сууцны барилга болон спорт цогцолборт барилга нурсан байна.

Спортын цогцолборт сагсан бөмбөгийн тэмцээн болж байсан бөгөөд хэд хэдэн хүн амь эрсэдсэн тухай мэдээллээ. Бого хотын өмнө хэсэг байдаг Сан Ремигио тосгонд арав гаруй хүн амиа алджээ. Тэдний дунд эргийн хамгаалалтын албаны гурван ажилтан, нэг гал сөнөөгч, хүүхэд байсан байна. Сан Ремигио тосгонд газар хөдлөх үеэр ус дамжуулах систем эвдэрсэн тул оршин суугчдад ундны ус, хоол хүнсний тусламж дэмжлэг үзүүлэхийг орон нутгийн эрх баригчид хүслээ. Филиппиний Улаан загалмайн нийгэмлэгийн мэдээллээр газар хөдлөх үед Себү, Лейти, Билиран гурван мужид 60 гаруй хүн бэртэж гэмтсэн байна.

Мөн сургууль, сүмийн барилгууд хэсэгчлэн нурсан тохиолдол гарсан байна. Тэдгээр барилгуудаас иргэдийг нүүлгэн шилжүүлжээ. Себү мужид газар хөдөлсний дараа худалдааны төв шатаж, МакДональдс түргэн хоолны сүлжээ өртжээ. Мөн газар хөдлөлтийн чичирхийлэл хүчтэй байснаас гоо бүсгүйн тэмцээн зохион байгуулагдаж байсан газрын тайзан дээрээс тэмцээний оролцогчид бууж зугтаж байгаа бичлэг цацагдсан байна. Түүнчлэн нийслэл Манила хотоос 70 км зайд байдаг Таал галт уул газар хөдлөх үед дэлбэрчээ. Галт уулын тогооноос 2500 метр өндөрт уур утаа савсаж, нэгдүгээр түвшний түгшүүр зарласан байна.

Хэдийгээр цахим сүлжээнд газар хөдлөлтийн бичлэгүүд цацагдаж байгаа боловч аль болох тайван байхыг Себү мужийн захирагч Пам Барикуатро оршин суугчдад уриалжээ. Мөн Филиппиний Засгийн газар байгалийн гамшигт өртсөн Себүгийн ард иргэдэд яаралтай тусламж илгээхээр болсныг сонордуулсан байна. АНУ-ын Газарзүйн судалгааны газар газар хөдөлсөн бүсийн ойролцоо амьдардаг хагас сая гаруй иргэн хүчтэй чичирхийлэл доргилт мэдэрсэн гэж тооцоолжээ.

Филиппин улс нь Номхон далайн газар хөдлөлт, галт уулын идэвхтэй бүсэд байрладаг. Тус улсад дэлхийн нийт галт уулын тэн хагасаас илүү нь байдаг. Тиймээс галт уул оргилох, газар хөдлөх, хар салхи шуурах зэрэг байгалийн гамшигт үзэгдэл ойрхон давтамжтай тохиодог. 2022 онд Лузоны хойд хэсэгт 7.0 магнитудын хүчтэй газар хөдөлж таван хүн амь эрсдэж, зуу гаруй иргэн гэмтэж бэртэж байсан юм. Мөн 2023 онд Филиппиний өмнөд хэсэгт газар хөдөлсний улмаас нэг хүн амь эрсдэж, олон мянган оршин суугчийг нүүлгэн шилжүүлж байжээ.