АНУ-ын Пэйнтэр фирмийн хуульч Роберт Пэйнтэр уржигдар Улаанбаатар хотноо хүрэлцэн ирж, Чингис хааны музей, Богдын музей үзэж, Гандан хийдээр зочлов. Тэрбээр онцгойлон Байгалийн түүхийн музейгээр орж, Тарбазавор Батаарыг “эргэв”.

Ноён Пэйнтэр 2013 онд АНУ-д хууль бус дуудлага худалдаагаар орж зарагдах гэж байхад нь шүүхийн шийдвэрийг цуцлуулж, Т.Батаар үлэг гүрвэлийн олдворыг “аврахад” чухал үүрэг гүйцэтгэсэн хүн юм байна.

Т.Батаарыг Нью-Йоркод дуудлага худалдаагаар зарагдах гэж байсныг зогсоож эх оронд нь авчрах ажлыг Америкийн талаас Р.Пэйнтэр, Монголын талаас тухайн үеийн Ерөнхийлөгчийн Тамгын газрын баг амжилттай зохион байгуулж байсан билээ. 70 сая жилийн настай Т.Батаарыг Улаанбаатарт авчирч, Сүхбаатарын талбайд түр байршуулах үед Р.Пэйнтэр Монголд ирж байсан аж.

Т.Батаарыг авчирснаас хойш 230 орчим ийм төрлийн эд өлгийн зүйл буцаж ирсэн нь музейн санг баяжуулж, ингэснээр жуулчдын сонирхлыг татах, Монголд аялал жуулчлал хөгжихөд тодорхой хувь нэмэр оруулах ач холбогдолтой юм. Хуульч Роберт Пэйнтэрэн энэ удаад тухайн үеийн Т.Батаарыг Монголд авчрах ажлын хэсгийн ахлагч, Ерөнхийлөгчийн хуулийн зөвлөх байсан П.Цагааны урилгаар хүрэлцэн иржээ.