Электрон тоглоомын CS2-ын төрлийн "PGL Bucharest 2025" тэмцээн Румын Улсын нийслэл Бухарест хотод өнөөдөр буюу дөрөвдүгээр сарын 6-д эхэлнэ. $1,250,000 (4.37 тэрбум төгрөг) шагналын сантай дэлхийн шилдэг 16 баг оролцох тэмцээнд Монголын "The MongolZ" баг хэсгийн сүүлийн тав дахь тоглолтодоо хожигдож тэмцээнийг өндөрлүүллээ.

Тодруулбал, өнгөрсөн шөнө манай залуус хоёр хожил, хоёр хожигдолтой байсан Европын холбооны Team Falcons багтай 1-2 (Mirage 13-9, Dust 2 6-13, Ancient 14-16) харьцаагаар хожигдол хүлээж энэ тэмцээнийг энд хүрээд өндөрлүүлж байна. Манай залуус сүүлийн хоёр тэмцээндээ шигшээ шатанд шалгарч чадалгүй тэмцээнийг өндөрлүүлж байгаа бөгөөд дараагийн тэмцээн нь дөрөвдүгээр сарын сарын 21-нд эхлэх "IEM Melbourne 2025" байх болно.

"The MongolZ" "PGL Bucharest 2025" тэмцээний эхний тоглолтоо Францын "3DMAX" багтай хийж 1-2 (Ancient 13-11, Inferno 10-13, Anubis 10-13) харьцаагаар, хоёр дахь тоглолтоо Польшийн Apogee багтай тоглож 0-2 (Ancient 8-13, Nuke 11-13) харьцаагаар хожигдоод байсан юм. Хожигдох эрхгүй тоглолтод Хойд Америкийн Team Liquid багтай тоглож 2-0 (Mirage 13-11, Anubis 13-7) харьцаагаар, дөрөв дэх тоглолтоо Бразилын "FURIA" багтай тоглож (Mirage 13-9, Nuke 13-11) харьцаагаар хожил байгуулаад байсан юм.

The MongolZ багийн бүрэлдэхүүнд дасгалжуулагчаар Баянбатын Эрдэнэдалай /maaRaa/, багийн ахлагч Бямбасүрэнгийн Гарьдмагнай /bLitz/, Мөнхболдын Содбаяр /Techno4K/, Банзрагчийн Өсөхбаяр /910/, Батболдын Аюуш /mzinho/, Мөнхболдын Азбаяр /Senzu/ нар тоглоно.