УИХ-ын дарга, гишүүн, ЕТГ-ын дарга зэрэг төрийн өндөр алба хашиж явсан З.Энхболд нарт холбогдох хэргийг Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүх шийдсэн. Ингэхдээ тус шүүхийн шүүгч Д.Шинэхүү “…З.Энхболдыг дан ганц мэдүүлгээр яллаж байгаа нь хуульд заасан хөдөлбөргүй нотлон тогтоох шаардлагыг хангаагүй буюу нотлогдвол зохих байдал тогтоогдохгүй байна гэж шүүх бүрэлдэхүүн дүгнэж, түүнийг цагаатгав” хэмээх №2024/ШЦТ/400 дугаартай шийдвэрийг 2025 оны хоёрдугаар сарын 5-нд гаргасан. Уг нь НПГ-аас “…З.Энхболд нь улс төрд нөлөө бүхий байдлаа ашиглан өөрийн хамаарал бүхий этгээдэд давуу байдал бий болгохоор бусдад нөлөөлсөн” гэж яллах дүгнэлт үйлдэж шүүхэд хүргүүлсэн байжээ.

Шүүх шийдвэрээ гаргасны дараа З.Энхболд цахим хуудастаа “…Шүүх хурал дууслаа. Цагаадлаа” гэж байв. Мөн 2025 оны хоёрдугаар сарын 9-нд “…Намайг нүүрсний хулгайч гэж гүтгэж шүүхээр яллахаа шахсан нөхдүүд өөрсдөө Засгийн газрын хуралдааны тэмдэглэлээр хууль бусаар Таван толгойн ордын хамгийн баян нэг толгой Ухаахудагийг хувьчилж авсан байдаг. Улсын төсвөөр хайгуул хийсэн орд бол улсын төрийн өмч. Төрийн өмчийг хувьчлах бол өмч хувьчлалын хуулийн дагуу УИХ, Засгийн газрын шийдвэр тогтоол гарах ёстой. Тэр тусмаа нийт Монголчуудыг 100 жил тэжээх стратегийн ордыг тэмдэглэлээр хувийн компанид үнэгүй өгч болохгүй. Жинхэнэ нүүрсний хулгай бол энэ л байна” гэсэн байдаг. 

Тэгвэл уг хэргийг өнгөрсөн долоо хоногт Нийслэлийн Эрүүгийн хэргийн давж заалдах шатны шүүх хүлээж авсан байна.

Эх сурвалж: “Зууны мэдээ” сонин

2025 ОНЫ ГУРАВДУГААР САРЫН 26. ЛХАГВА ГАРАГ. № 55 (7552)