Оюуны өмч, улсын бүртгэлийн ерөнхий газрын дарга Р.Содхүүгээс гадаад паспорттой холбоотой асуудлаар зарим зүйлийг тодрууллаа.

 

-Гадаад паспортын үйлчилгээг дүүрэгт шилжүүлнэ гэсэн. Энэ талаар дэлгэрэнгүй мэдээлэл өгөхүй юу?

-Монгол Улсын Засгийн газрын 100 хоног болон Оюуны өмч, улсын бүртгэлийн газрын 75 хоногийн ажлын үр дүн гарч эхэллээ. Юуны түрүүнд энэ хугацаанд хийсэн ажлаа танилцуулъя. Засгийн газрын 100 хоногийн хугацаанд маш олон ажлыг амжууллаа. Тухайлбал, улсын бүртгэлд 23548 хүн шинээр бүртгэгдэж, Монгол Улсын хүн ам өнөөдрийн байдлаар 3.104.201 мянгад хүрсэн.

 

Мөн 28938 хүүхэд мэндэлж, 5304 өрх айл шинээр гэрлэлтээ батлуулсан байна. Түүнчлэн 57 мянган хүүхэд 16 нас хүрч, иргэний үнэмлэхээ авлаа. Энэ мэтчилэн олон ажлыг хийж, хэрэгжүүлсэн. Засгийн газрын 100 хоногийн хугацаанд гэхэд л 94830 иргэн гадаад паспортын захиалга өгч, авсан байна. Ер нь улс орны гадаад харилцаа хөгжихийн хэрээр манай улсын иргэдийн аялах нь ихэссэн.

 

Тэр дундаа ОХУ, БНХАУ, Солонгос улс руу их зорчиж байна. Үүнтэй холбогдуулан гадаад паспортын хэлтэс маш ачаалал ажилладаг. Тиймээс иргэдэд түргэн шуурхай үйлчилгээ үзүүлэх, 100 айл дахь гадаад паспортын хэлтсийн ачааллыг бууруулахын тулд гадаад паспорт сунгуулах үйлчилгээг дүүрэгт шилжүүлсэн. Өөрөөр хэлбэл, харьяа дүүргийнхээ иргэний бүртгэлийн хэлтэст гадаад паспортоо сунгуулах боломжтой.

 

-Өнгөрсөн наймдугаар сард гадаад паспортын бэлдэц дууссан гэдэг шалтгааны улмаас нэлээд чирэгдэл үүссэн. Энэ ямар учиртай юм бэ. Одоо хэвийн ажиллаж байгаа юу?

-Өнгөрсөн саруудад гадаад паспортын бэлдэц хомсдсоны улмаас хэвлэлт саатах үе гарсан. Харин өнгөрсөн наймдугаар сараас төсөв санхүүг шийдэж, бэлдэцийг ХБНГУ-д үргэлжлүүлэн захиалснаар ажил хэвийн явагдаж байна. Гадаад паспортын бэлдэц дууссан нь өмнөх ажилтнуудын хариуцлагагүй байдалтай холбоотой. Тухайн үеийн ажилчдын хариуцлагагүй байдлаас болж гадаад паспортын бэлдэцийг хэвлэдэг Германы компанид хэвлэлтийн зардлаа төлөөгүй байсан учраас гэрээ зогссон юм. Үүний улмаас бэлдэц хомстсон. Бид ажлаа аваад Герман улс руу төлөөлөгч явуулж шинэчилсэн гэрээ байгуулсан. Одоо гадаад паспортын захиалга, хэвлэлт жигдэрсэн.

 

-Төрийн нэгдсэн үйлчилгээний цэгүүдэд гадаад паспорт захиалах боломжтой болно гэсэн. Энэ талаар дэлгэрэнгүй мэдээлэл өгөхгүй юу?

-Тийм. Гадаад паспортын захиалгыг ОӨУБЕГ-ын үйлчилгээний хэлтэст авахаас гадна “Мишээл”, “Драгон”, “Дүнжингарав” гэсэн гурван үйлчилгээний төвд байрлах нэг цонхны үйлчилгээгээр авах боломжтой. Эдгээр төвүүдэд дүүрэг хамаарахгүй гадаад паспортын захиалга авна.

 

-Хэзээ хэрэгжиж эхлэх вэ?

-Арваннэгдүгээр сарын 2-ноос эхлэн дээрх хоёр үйлчилгээг иргэд авах боломжтой. Мөн  гадаад паспортыг шинээр захиалахад 7-14 хоног хүлээдэг. Гэхдээ бид иргэдийн дунд эрэлт үүссэн учраас долоо хоногийн хугацаанд олгож байна. Өнөөдрийн байдлаар захиалсан эзэн нь ирж аваагүй 5000 гаруй гадаад паспорт ОӨУБЕГ-ын үйлчилгээний гуравдугаар хэлтэст байна. Тэгэхээр захиалга өгсөн иргэд паспортоо ирж авах хэрэгтэй.

 

-Нэгдсэн үйлчилгээний төвд гадаад паспорт захиалахад хугацааны хувьд ямар байх вэ. Удах уу?

-Үгүй. ОӨУБЕГ-т захиалдаг шиг хугацаанд гарна. Түүнээс өөр газар очсон гээд удаж гарна гэсэн зүйл байхгүй. Хамгийн гол нь бид иргэдэд түргэн шуурхай үйлчилгээ үзүүлэхийн тулд энэ ажлыг зохион байгуулсан.