Монгол Улсад сүүлийн 20 гаруй жил зонхилон тохиолдож байгаа зүрх судас, хорт хавдар, чихрийн шижин зэрэг халдварт бус өвчин нь нийгмийн эрүүл мэндийн тулгамдсан асуудал болж байна.

Өвөрхангай аймгийн хувьд зүрх судасны өвчлөл, цус харвалт, элэгний хавдар нь нас баралтын тэргүүлэх шалтгаан болж байгаа юм. 2022 оны байдлаар нийт нас баралтын 253 буюу 49.5 хувь нь зүрх судас, 145 буюу 28.5 хувь нь хавдрын өвчлөл байна.

Иймд чихрийн шижин, зүрх судасны өвчний тархалтыг бууруулах, урьдчилан сэргийлэх, эрсдэлт бүлгийн хүмүүст үзүүлэх тусламж үйлчилгээг чанартай, хүртээмжтэй хүргэх зорилго бүхий “МОНПЭН санаачилга” төслийг ДЭМБ-ын тусламжтайгаар Өвөрхангай аймагт хэрэгжүүлэхээр өнөөдөр нээлтийг хийлээ.

Нээлтийн үйл ажиллагаанд УИХ-ын гишүүн, Эрүүл мэндийн сайд С.Чинзориг, ДЭМБ-ын Монгол дахь Суурин төлөөлөгч Др Сокорро Эскаланте, аймгийн Засаг дарга А.Ишдорж болон аймгийн эрүүл мэндийн байгууллага, сумдын ЭМТ, өрхийн ЭМТ-ийн төлөөлөл оролцов.

Мөн Өвөрхангай аймгийн нийгмийн эрүүл мэндэд тулгамдаж буй асуудлаар уулзалт хийн зөвлөлдсөн бөгөөд эрүүл мэндийн зөв дадал хэвшлийг хүүхэд байхаас нь ойлгуулж, заан сургавал эрүүл зан үйлийг насан туршдаа баримталж, ингэснээр халдварын бус өвчлөлийг эрс бууруулах боломжтой хэмээн Суурин төлөөлөгч Др Сокорро Эскаланте онцлон зөвлөлөө.