Завхан аймгийн Тосонцэнгэл суманд тарваган тахал өвчний тохиолдол батлагдсан учир тус сумын хэмжээнд хорио цээрийн дэглэмийг чангатгажээ.

Сумын нутаг дэвсгэрт тарваган тахлын улмаас хорио цээрийн дэглэмийг 2020 оны есдүгээр сарын 5-ны 00.00  цагаас есдүгээр сарын 11-ний 23.59 цаг хүртэл тогтоолоо. Хорио цээрийн дэглэмийн хугацаанд сумын төвийн худалдаа үйлилгээний байгууллагууд, бөөний төв, рестораны цагийн хуваарийг 10.00-18.00 цаг хүртэл ажиллуулж архи согтууруулах ундаагаар үйлчлэх, худалдан борлуулахыг хориглолоо.

Мөн сургууль, цэцэрлэг, МСҮТ ийн үйл ажиллагааг есдүгээр сарын 7- 11-нийг дуустал зогсоож, тоглоомын талбай олон нийтийн газруудад иргэдийг олноор бөөгнөрүүлэхгүй байх, сумаас гарах, орох хөдөлгөөнийг есдүгээр сарын 11-ний өдөр хүртэл хязгаарлалаа. 

Өвчтөний биеийн байдал хүнд байгаа бөгөөд нэгдүгээр хавьтлын 25 хүнийг МСҮТ-ийн дотуур байранд шилжүүлэн тусгаарлаж эмнэлгийн хяналтанд оруулаад байна. Мэргэжлийн хяналт, Цагдаагийн газар, Онцгой байдлын алба хаагчид хяналт тавьж хэв журмыг сахиулан ажиллаж байна хэмээн МХЕГ-аас мэдээллээ.