Африкийн Габон улсад төрийн өмчит телевизийн нэвтрүүлэг алдаа гаргаж, Ерөнхийлөгч Али Бонго Ондимбаг нас барсан гэж дамжуулсныхаа төлөө ажлаасаа халагджээ. Габоны Үндэсний телевизийн мэдээлснээр Вивине Овандонг гэх эмэгтэй нэвтрүүлэгч энэ сарын 8-ны өдрийн мэдээллийн хөтөлбөрийн үеэр бичмэл мэдээллийг уншихдаа алдаа гаргаж “Ерөнхийлөгч Али Бонго Ондтимба Испанийн Барселона хотод нас барсан” хэмээн дамжуулсан аж.

Гэвч үнэн хэрэгтээ тухайн өдөр нь өнөөгийн Ерөнхийлөгчийн эцэг экс Ерөнхийлөгч Омар Бонго агсны нас барсан  өдөр тохиож байжээ. Тэрээр 40 гаруй жил улсын төрийн эрхийг барьсны эцэст 2009 оны зургадугаар сарын 8-нд Барселонад таалал төгссөн байна.

Гэтэл түүний хүү өнөөгийн Ерөнхийлөгч эрүүл саруул амьд мэнд байсаар атал сэтгүүлч ийн алдаа гаргаснаар сошиал медиад томоохон сенсааци дэгдэж,  арга хэмжээ авхуулсан аж.

Сэтгүүлч бүсгүй олон жил телевиздээ мэдээний сэтгүүлчээр ажиллаж байгаад саяхнаас нэвтрүүлэгч болсон байсан гэнэ.