Их Британийн Манчестер дахь концертын танхимд дэлбэрэлт болж, 22 хүн нас барсантай холбогдуулан Хойд Солонгосоос тус улсад эмгэнэл илэрхийлжээ. Энэ талаар төрийн өмчит KCNA агентлаг мэдээлсэн байна.

Хойд Солонгосын Ерөнхий сайд Пак Пон Жу Их Британийн Ерөнхий сайд Тереса Мэйд гашуудлын мессеж илгээсэн аж.

Тус мессежид “Хойд Солонгосын ард түмэн британичуудын уй гашууг хамт хуваалцахыг хүсч байна. Террорист ажиллагааны сөрөг нөлөөг Британийн Засгийн газар, хотын иргэд чадах чинээгээрээ хурдан хугацаанд даван туулахыг хүсье” гэж бичигдсэн байна. Түүнчлэн, Хойд Солонгосын Гадаад хэргийн сайд Ри Ён Хо ч тус улсын Гадаад хэргийн сайд Борис Жонсонд мөн ижил утга бүхий мессеж илгээсэн аж.