Дорноговь аймаг энэ оныг их бүтээн байгуулалтын жил болгон зарласан. Үүнтэй холбогдуулан Сайншанд сумын хур хогийг цэвэрлэж эхэлжээ. Тодруулбал, тус сумыг Замын-Үүд сумтай холбосон хатуу хучилттай зам дагуу олон жил барилгын хог хаягдал хаяснаас болж хур хог үүссэн байна. Тиймээс Дорноговь аймгийн Тохижилт - Сайншанд хот тохижилтын газраас хур хогийг цэвэрлэх ажлыг эхлүүлжээ. Үүнтэй холбогдуулан тус аймгийн Засаг даргын Тамгын газрын дарга Б.Ганзориг Тохижилт - Сайншанд хот тохижилтын газрын ажилчидтай уулзаж, тэдний санаа бодлыг сонсохоос гадна халуун хоол, цайгаар дайлав.

Энэ үеэр Тохижилт - Сайншанд хот тохижилтын газрын дарга Б.Жаргалсайханаас зарим зүйлийг тодрууллаа.

-Танай байгууллага 2017-2018 оны зорилгоо хэрхэн тодорхойлсон бэ?

-Манай байгууллага Сайншанд хотын оршин суугчдын амьдрах орчин нөхцөлийг сайжруулахын тулд хог хаягдалгүй, ногоон байгууламжийг бий болгох үүрэгтэй.

Энэ хүрээнд олон жил хуримтлагдсан хур хогийг сүүлийн гурван өдөр тасралтгүй хүн хүч, тэрэг техникийн хүчээр цэвэрлэхээр ажиллаж байна. Өнөөдөр манай аймгийн Засаг даргын Тамгын газрын дарга Б.Ганзориг бидэнд өдрийн хоол өгч, бидний ажилд дэмжлэг үзүүллээ. Хөдөлмөр хийж байгаа хүмүүст хоол их чухал. Хоол, хүнс сайн бол ажил хийхэд илүү урам зоригтой байдаг. Олон жил хуримтлагдсан хогний ихэнх нь барилгын чулуу, тоосго байна. Үүнийг ухах гэхээр цаанаас нь бүр их хог гарч ирдэг. Энэ их хогийг цэвэрлэхэд манай машины хүчин чадал төдийлөн сайн хүрэлцэхгүй байна. Ихэнх нь БНХАУ-д үйлдвэрлэсэн “Кама”, “Сонсмол” зэрэг машин учраас хог ачихад тохиромж муутай байна. Бид аргаа барахдаа ковшоор бөөгнөрсөн хогийг түрж, тараасны дараа ажилчдаа эгнээгээр явуулж том хогийг нь түүлгэсэн. Үүний дараа дахин машинд ачдаг. Ингэж л зохицуулж байна. Бид дараагийн ээлжинд замын урд талын хогийг цэвэрлэхээр төлөвлөсөн.

-Танай байгууллагын хүчин чадал хүн ам, газар нутагтайгаа харьцуулахад хэр байна вэ. Цаашид боловсон хүчнийг нэмэгдүүлэх шаардлага тулгарч байна уу?

-Манай хот тохижилтын байгууллага үнэхээр өөрсдийнхөө хүч хөдөлмөрөөр л болгож байна. Хүн хүч, машин техникийн хувьд ч нэмэгдүүлэх шаардлагатай. Учир нь манай байгууллага ногоон байгууламж, хог зөөвөр, гэрэл гэрэлтүүлэг, зам талбай, аялал жуулчлалын чиглэлд үйл ажиллагаа явуулдаг учраас бүх л зүйлд оролцдог. Хүн хүч бага болохоор нэгийг нь нөгөө рүү нь шилжүүлээд л явдаг.

-Санхүү, төсөв жилийн хэрэгцээнд хүрэлцэж байна уу?

-Хуваарилагдсан төсөв болохын хувьд болж байна. Гэхдээ төсөв хөрөнгө огт дутагдалгүй байна гэж үгүй шүү дээ. Байгаа төсвөө бид аль болох аж ахуйн аргаар болон нөөцдөө тулгуурлан зохицуулаад л явж байна. Мөн манай ажилчдын нийгмийн асуудалд онцгой анхаарах зүйл олон бий. Тухайлбал, манай ажилчдын өдрийн хоол, унааны мөнгийг төсвийн тодотголоор хасагдчихсан. Үүнийг анхааарч, ядаж өдрийн хоолных нь мөнгийг эргүүлэн олгоосой гэж их боддог юм. Гэхдээ манай УИХ-ын гишүүн, аймаг орон нутгийн удирдлагууд биднийг их ойлгож, дэмждэг. Хамтын ажиллагаатай байдагт нь баярлаж явдаг.