Өнгөрөгч бямба гарагт болсон бүх нийтийн марафон гүйлтийн үеэр гадны хоёр иргэн Нийслэлийн Засаг даргын тамгын газрын өмнөх мод руу бие засч буй зураг сошиал орчинд тарсан билээ. Тэдний гаргасан үйлдэл нийгмийн сүлжээний талцах сэдэв болж, нийтийн бие засах газар олноор бариагүй хотын даргаа зэмлэж, харин ч сануулга боллоо хэмээн бухимдаж байлаа.

Тэгвэл эдгээр иргэдийг Чингэлтэй дүүргийн Цагдаагийн нэгдүгээр хэлтэс эрэн сурвалжилж илрүүлсэн байна. Улмаар Төр захиргааны байгууллагын өмнө бие зассан зөрчил гаргасныг нь танилцуулжээ. Хоёр гадны иргэний тухайд хэлмэрчгүй явсан учраас бие засах газар олж чадаагүй. Тиймээс яах ч арга байгаагүй. Өөрсдийн гаргасан үйлдэлдээ гэмшиж байна хэмээн тайлбар өгчээ.

Түүнчлэн, Монгол Улсын иргэдээс уучлал гуймаар байна хэмээжээ. Тэгвэл эдгээр иргэдийг зөрчил гаргасан гэж үзэн Захиргааны хуулийн 21 дүгээр зүйлд заасны дагуу 15 мянган төгрөгөөр торгох шийтгэл ногдуулжээ. Гэвч энэ хоёр иргэний үйлдэл Монгол Улсыг доромжилсон үйлдэл болсноос гадна нийтийн бие засах газар олноор байгуулах учиртайг сануулсан нэгэн том сануулга болсон билээ.