Он солигдох мөч айсуй. 2016 он улиран одож, 2017 он гарах мөч ойртож буй энэ үед дэлхий дахинаа ямар үйл явдал болохыг сонирхуулахаар бэлдлээ. Ингэхдээ ирэх онд болох 10 томоохон үйл явдлын хуанлиг уншигчиддаа хүргэж байна.

2017-01-01 АНУ-ын Нью-Йоркт

АНУ-ын Нью-Йорк хотод байрлах НҮБ-ын төв байранд энэ өдөр тангараг өргөх ёслолын ажиллагаа болох учиртай. Тодруулбал, Португалийн Ерөнхий сайд асан Антонио Гутеррес НҮБ-ын Ерөнхий нарийн бичгийн даргын албан тушаалд албан ёсоор томилогдох бол эсрэгээр 10 жил тус байгууллагыг тэргүүлсэн Бан Ги Мүн суудлаа  шилжүүлэх билээ.

2017-01-20 АНУ

Америкчууд төдийгүй, дэлхий нийтийн гайхшруулан АНУ-ын Ерөнхийлөгчийн сонгуульд төлөөлөгчдийн саналаар тэргүүлсэн үл хөдлөх хөрөнгийн тэрбумтан Доналд Трамп энэ өдөр тангаргаа өргөнө. Ингэснээр тэрбээр тус улсын 45 дахь Ерөнхийлөгч болж түүхэнд нэрээ мөнхлөх юм. Харин америкчууд түүхэн дэх хамгийн баян, улс төрийн туршлагагүй, цэргийн алба хаагаагүй анхны Ерөнхийлөгчөө угтан авна. Трамп тангаргаа өргөснөөр  Барак Обамагийн улс төрийн бодлого  орвонгоороо өөрчлөгдөнө гэдгийг ажиглагчид хэлж буй.

2017-03-31 Их Британи

Их Британийн Ерөнхий сайд Тереса Мэй ЕХ-ны  үндсэн нөхцөл болох Лисбоны гэрээний 50 дугаар зүйлийг хэрэгжүүлж эхлэх юм. Энэ нь Их Британи улс Европын холбооноос гарах анхны алхам болно.

2017-04-23 Франц

Францын Ерөнхийлөгчийн сонгуулийн эхний сунгаа энэ өдөр орон даяар явагдана. Харин тус санал хураалтад хамгийн өндөр санал авсан  нэр дэвшигчдийн шийдвэрлэх санал хураалт тавдугаар сарын 7-нд болох юм. Сонгуульд эрх баригч намаас Ерөнхий сайд асан Мануэль Валлс өрсөлдөх бол өнөөгийн төрийн тэргүүн Франсуа Олланд нэр дэвшихгүй.  

2017-05-19 Иран

Энэ өдөр Ираны Ерөнхийлөгчийн сонгууль болно. Сонгууль өнөөгийн төрийн тэргүүн Хассан Рухани улиран сонгогдож, хоёр дахь бүрэн эрхийн хугацаагаа үргэлжлүүлэх төлөв ажиглагдаж буйг ажиглагчид онцолж байгаа.  Ираны түүхэн дэх 12 дахь Ерөнхийлөгчийн сонгуульд 18-аас дээш насны иргэд оролцон өөрсдийн төлөөлөлдөө саналаа өгөх юм.

2017-08-04 Их Британи Лондон

Их Британийн Лондон хотод энэ өдөр 16 дахь удаагийн хөнгөн атлетикийн Дэлхийн аварга шалгаруулах тэмцээн болно. Тус тэмцээн наймдугаар сарын 13-ны өдрийг хүртэл үргэлжлэх юм.

2017-08-08 Кэни

Кэничүүд энэ өдөр шинэ Ерөнхийлөгчөө сонгоно. Насанд хүрсэн 22 сая хүн уг сонгуульд оролцож саналаа өгөх юм.

2017-09-12 Перу

Олон улсын Олимпийн хорооны их хурал энэ өдөр болно. Энэ хурлаар 2024 оны өвлийн олимпийг зохион байгуулах хотыг тодруулах юм.

2017 он 09-10 сар Герман

Германы парламентын сонгууль болно. Тус сонгуульд Германы канцлер Ангела Меркель Христийн ардчилсан холбоо намаа удирдан оролцох юм. Хэрэв түүний тэргүүлж буй нам ялалт байгуулвал А.Меркель дөрөв дэх удаагаа улиран сонгогдсон канцлер болох билээ.

2017-11-06 Германы Бонн  

НҮБ-ын Уур амьсгалын өөрчлөлтийн суурь конвенцийн 23 дугаар уулзалт энэ өдөр болох бөгөөд уулзалтыг Фижи зохион байгуулна. Уулзалт 17-ны өдрийг хүртэл үргэлжилнэ.