Дорнод аймгийн Онцгой комисс өнөөдөр хуралдаж, цаг агаарын аюулт үзэгдлийн талаарх мэдээлэл солилцож, холбогдох арга хэмжээг авч хэрэгжүүлэхээр шийдвэрлэлээ.  

2026 оны 2 дугаар сарын 24-нөөс 25-нд шилжих шөнө ихэнх нутгаар, 25-ны өдөр нийт нутгаар цас орж, салхины хурд секундэд 14-16 метр хүрч ширүүсэх төлөвтэй байна.

Ийнхүү нөхцөл байдалтай уялдуулан Чойбалсан хотоос Баян-Уул, Баяндун, Цагаан-Овоо, Сэргэлэн, Дашбалбар, Гурванзагал, Чулуунхороот сумдын чиглэлд зорчих автомашины хөдөлгөөнийг түр хугацаагаар хязгаарлаж, орон нутгийн чанартай автозамыг хаах шийдвэрийг гаргалаа.

Мөн Халхгол сумын нутаг дэвсгэрт ахин цас орж, цасан шуурга шуурах төлөвтэй байгаа тул тус чиглэлийн автозамыг хаасан хугацааг 2 дугаар сарын 25-ны өдрийн 20:00 цаг хүртэл сунгахаар болов. Түүнчлэн Чойбалсан хотоос 6 чиглэлд зорчих автозамыг ковш машинаар нээх ажлыг зохион байгуулахаар шийдвэрлэж, холбогдох байгууллагууд бэлэн байдалд ажиллаж байна.