“...Гэрээ засаад төрөө зас” гэдэг. Дээд шүүхээр даргаа бүртгүүлж “гэрээ зассан”-аасаа хойш АН-ынхан “бяр” оржээ. “...Одоо МАН-ын асуудлыг шийднэ” гээд ханцуй шамлаад эхэлсэн байна.

Уг нь, АН-ынханд шийдэх асуудал их бий. Юуны өмнө, хэнийг генсек болгох дээрээ учраа олж тохирцгоохгүй бол улс төрийн шийдвэр нь аль эрт гарчихсан л дуулдсан. Харин, тэр улс төрийн шийдвэрийг хэрэгжүүлэх эсэхээ АН-ын дарга О.Цогтгэрэл өглөө, үдэшгүй бодож суугаа юм байна лээ. Товчхондоо, АН-ын анхдагчуудын төлөөлөл С.Баярцогт уу, аль эсвэл залуусаас нь генсек тодрох уу гэдэг тодорхойгүй болоод байгаа юм. АН-ын дарга О.Цогтгэрэл хэн нэг “нэр” дээр шийдлээ гэхэд түүнийгээ журмын нөхөддөө яаж ойлгуулах вэ гэдэг асуудал гарна. Чухамдаа, МАН-ыг л хэлээд байгаа болохоос биш АН-д үе хоорондын зодоон аль эрт эхэлчихсэн. Энэ намынхан уулзахаараа үүнийг л ярьдаг. Нүүрийг нь хараад хэлж чадахгүй ч өөр зууртаа “...Баярцогт, Хурц хоёр даварлаа” гэж яриад удаж л байна. Тиймээс, АН-ын генсекийн асуудал амар шийдэгдэхгүй л болов уу. Генсекийн араас АН-ын Улс төрийн зөвлөл гэж 20 гаруй хүн байдаг бүтэц дээр сэлгээ явна. Тэгээд ҮБХ-ны гишүүдэд ротац хийнэ. Улмаар, АН-ын аймаг нийслэлийн дарга нар шинээр сонгогдоно. Дуусашгүй олон томилгоо тэднийг хүлээж байна. За, тэгж байтал 2027 оны Ерөнхийлөгчийн сонгуульд хэн дэвшихийг шийдэх үе тулна. Бас л нэлээд асуудал болно. Гэхдээ, АН-ынхан эдгээрийг асуудал гэж бодохгүй байгаа бололтой. МАН-ын дарга хэн болох вэ гэдэг дээр идэвхийлэн “хэлэлцэж” байна. Тэд Д.Амарбаясгалан, Г.Занданшатар хоёрыг дэмжигчид гээд хуваагдчихсан байх юм. Хуваагдахаар барахгүй, “...Д.Амарбаясгалан нь дээр”, “...Г.Занданшатарыг дэмжинэ” гээд хоёр тал болоод хэрэлдэж байгаа нь олонд ил болжээ. АН-ынхан угаасаа хээ шаагүй ярьж хэлцгээдэг юм болохоор бие биеэ хэцүү, хатуу үгээр нүдэж л байх шиг байна. Яагаад ингэж МАН-ын асуудлаар маргаж хэрэлдээд байгааг нь сайн ухвал, хамтарсан засагт байсан, үгүйгээрээ салчихсан бололтой юм. Зөвхөн МАН-ын даргын асуудал ч бус өөр зууртаа ч бас хэд хэд салжээ. Нэг хэсэг нь Лу.Гантөмөр, Ц.Туваан нар руу, бас нэг хэсэг нь Женкогийнхон гээд Х.Баттулга, С.Ганбаатар нар руу, нөгөө хэсэг нь С.Баярцогт, Б.Хурц руу гээд хэрүүлийн сүлжээ л болж байна. Явж явж “...МАНАН гэж аль нь вэ” гэдэг дээр маргаан хайнаа хагалах даг. Нөгөөтэйгүүр, АН-аас УИХ-д сонгогдсон нэг бус гишүүн дээр хууль хяналтын байгууллагын ажиллагаа явагдаж, эхнээсээ прокурор, шүүхэд шилжих дээрээ тулсан. Заримынх нь асуудал ч хэдийнэ олны хүртээл болчихоод байна. Х.Тэмүүжин, С.Ганбаатар гээд АН-ын хаягтай гишүүдийн 10-аас дээш жилийнх нь өмнөх асуудал яагаад ч юм “амилж” шүүх, прокурор үзэж хараад эхэлсэн. АН гишүүдээ өмөөрөх үү. Бүлэг фракц өөр гээд шүүх рүү түлхэх үү. Энэ дээрээ нэгдэх үү, салах уу гэдгээ ч АН-ынхан ойрын үед ярих бололтой. Ерөнхийдөө л, АН-ынхан маань иймэрхүү бужигнаантай, нэг талаас баахан замбараагүйдүү л явж байгаа харагдана. “...Эднийгээ иймээр нь байлгах уу, нам юм чинь нэг бодлоготой болгох уу” гэдэг АН-ын дарга О.Цогтгэрэлийн л ажил болж таарна даа. 

Эх сурвалж: “Зууны мэдээ” сонин

2025 ОНЫ ЕСДҮГЭЭР САРЫН 22. ДАВАА ГАРАГ. № 177 (7674)

Уншигч Танд “Зууны мэдээ” сонины нийтлэлтэй холбоотой санал, шүүмжлэл, хүсэлт байвал zuuniimedee@gmail.com хаягаар илгээгээрэй.