Хүүхэд харах үйлчилгээ эрхлэгчдийн нэгдсэн зөвлөлөөс өнөөдөр хэвлэлийн бага хурал хийлээ. Хурлын үеэр тус зөвлөлөөс Монгол Улсын Ерөнхийлөгч, Монгол Улсын Ерөнхий сайд, УИХ-ын дарга болон УИХ-ын гишүүд, нэр бүхий сайд нарт хандаж шаардлага хүргүүлж буйгаа мэдэгдсэн юм. Тус хэвлэлийн бага хуралд хүүхэд харах үйлчилгээний зөвлөлийн ажлын хэсгийн зохицуулагч М.Мягмардорж, Хүүхэд харах үйлчилгээний ажлын хэсгийн ахлагч Б.Өлзийбат болон есөн дүүргийн хүүхэд харах үйлчилгээ эрхлэгчдийн төлөөлөл оролцсон юм.

Хурлын үеэр , Хүүхэд харах үйлчилгээний ажлын хэсгийн ахлагч Б.Өлзийбат “Анх 2015 оны долдугаар сарын 2-нд УИХ-ын чуулганаар Хүүхэд харах үйлчилгээний тухай хуулийг баталж,  2016 оны нэгдүгээр сарын 1-нээс хэрэгжиж эхэлсэн. Энэ хуулийг батлахдаа 10.8 тэрбум төгрөгийг улсын төсөвт суулгаж, 2016 онд 10 мянган хүүхдийг хамруулна гэсэн. Одоогийн байдлаар улсын хэмжээнд 6000 хүүхэд хүүхэд харах үйлчилгээнд хамрагдаж байна. Мөн тус үйлчилгээг 437 иргэн эрхэлж, 1024 тогтмол ажлын байр бий болсон. Үүнээс гадна 6000 эцэг, эх ажлын байртай болох болмж бүрдсэн.

Гэтэл шинээр бүрдсэн УИХ энэ оны наймдугаар сарын төсвийн тодотголоор Хүүхэд харах үйлчилгээний тухай хуулийн санхүүжилтыг хасч, 2021 он хүртэл болгож хойшлуулсан. Тиймээс бид өнөөдөр нэгдэж хэвлэлийн бага хурал зарласан. Энэ хүрээнд Нийгмийн хамгаалал, хөдөлмөрийн сайд Н.Номтойбаяр, Монгол Улсын Ерөнхийлөгч, Ерөний сайд, УИХ-ын дарга, УИХ-ын байнгын хорооны ажлын хэсэг, УИХ-ын 76 гишүүдэд шаардлага хүргүүлж байна” гэв.

Мөн тэд тус үйлчилгээний Нийгмийн хамгаалал, хөдөлмөрийн яамны сайдын багцад багтсан байдаг бөгөөд эхний удаад таван тэрбум төгрөг суулгах шаардлагатайг онцолсон. Хүүхэд харах үйлчилгээ эрхлэгчид болон эцэг, эхчүүд шаардлагыг нь 36 цагийн дотор авч хэлэлцэхгүй бол энэ сарын 3-нд болох УИХ-ын чуулганыг зогсооно гэдгээ мэдэгдлээ. Мөн энэхүү үйл ажиллагаанд нэгдэж нийт 7000 гаруй гарын үсэг зурсан байна.