Дэлхийн шилдэг 16 баг оролцдог электрон тоглоомын CS2-ын 400,000 ам.долларын (1.38 тэрбум төгрөг) шагналын сантай "BLAST Open Spring 2025" тэмцээн өнөөдөр буюу гуравдугаар сарын 19-нөөс эхэлсэн бөгөөд хэсгийн шатны тоглолтод манай улсаас хоёр баг оролцож байгаа билээ.

Шууд урилгаар тоглохоор болсон "The MongolZ" баг B хэсэгт багтсан бөгөөд хоёр дахь тоглолтоо Украйны Natus Vincere багтай өнгөрсөн шөнө тоглолоо. Манай залуус 1-2 (Dust II 7-13, Inferno 13-1, Mirage 13-16) харьцаагаар хожигдож доод хүснэгт рүү унаж байгаа бөгөөд тэд өнөөдөр /2025.03.23/ шөнө 23:00 цагаас Team Liquid багтай хасагдах шатны тоглолт хийхээр болов. Улмаар хожвол G2 болон M80 багуудын аль ялсантай шигшээ шатны эрхийн төлөө тоглох юм. Харин Natus Vincere баг шигшээ шатанд шалгарлаа. 

"The MongolZ" эхний тоглолтоо Хойд Америкийн "M80" багтай өнгөрсөн шөнө тоглож 2-1 (Dust II 13-11, Ancient 11-13, Inferno 13-3) харьцаагаар хожсон юм.

Харин манай нөгөө баг болох "S-Tier" буюу CS2-ын хамгийн өндөр зэрэглэлийн тэмцээнд анх удаа тоглож буй The Huns Esports тэмцээний А хэсэгт орж эхний тоглолтоо Оросын "Team Spirit" багтай анх удаа учраа таарч 0-2 (Anubis 8-13, Dust II 4-13) харьцаагаар хожигдсон юм. Улмаар доод хүснэгт рүү унаж өчигдөр /2025.03.21/ Европын холбооны "Team Falcons" багтай 0-2 (Inferno 13-16, Ancient 6-13) харьцаагаар хожигдож тэмцээнээ өндөрлүүллээ. Манай залуус ийнхүү тэмцээнээ 13-16-р байраар дуусгаж $5,000 (17.3 сая төгрөг) шагнал авлаа.

The MongolZ багийн бүрэлдэхүүнд дасгалжуулагчаар Баянбатын Эрдэнэдалай /maaRaa/, багийн ахлагч Бямбасүрэнгийн Гарьдмагнай /bLitz/, Мөнхболдын Содбаяр /Techno4K/, Банзрагчийн Өсөхбаяр /910/, Батболдын Аюуш /mzinho/, Мөнхболдын Азбаяр /Senzu/ нар тоглоно.

The Huns Esports багийн бүрэлдэхүүнд дасгалжуулагч Батсүхийн Болд /ncl/, багийн ахлагч Гантулгын Есөнтөмөр /nin9/, Батболдын Баатархүү /Bart4k/, Ууганбаярын Анарбилэг /cobrazera/, Энхбатын Мөнхтогтох /xerolte/, Рийнагийн Билэгсайхан /Veccil/ нар тоглож байна.