Цаг үеийн нөхцөл байдалтай холбоотойгоор ХЭҮК-ын анхаарал хандуулж буй асуудлын талаар ХЭҮК-ын Гомдол, хяналт шалгалтын хэлтсийн дарга Г.Ууганбаатар мэдээлэл өглөө. Тэрээр "Монгол Улсад ОХУ-ын ерөнхийлөгч албан айлчлал хийсэнтэй холбогдуулан айлчлалын үеэр иргэд үзэл бодлоо илэрхийлсэн. Энэ үеэр иргэдийг цагдаагийн байгууллагаас саатуулсан. Энэ үйл явцад ХЭҮК тогтмол хяналт, шалгалтаа тавьж ажилласан. Жагсаал болсон Сүхбаатарын талбай, Сүхбаатар дүүргийн нэгдүгээр хэлтэс дээр шуурхай ажиллаж, холбогдох мэдээллийг солилцож ажилласан. 

Иргэдийн хувьд үзэл бодлоо илэрхийлэх, жагсаал цуглаан хийх эрх нь нээлттэй. Гагцхүү энэ удаагийн үйл явдал тусгайлсан горимоор явагдаж байгаа. Төрийн тусгай хамгаалалтын тухай хуульд заасны дагуу хамгаалалтыг гурван зэрэглэлтэй зохион байгуулж байгаа. ОХУ-ын Ерөнхийлөгчийн албан айлчлал нь хуульд заасны дагуу нэгдүгээр зэргийн хамгаалалттай арга хэмжээ байсан. Жагсаал хийж буй иргэдэд хамгаалалтын хоёрдугаар зурваст жагсаал хийх боломжтой гэсэн зөвлөмжийг Цагдаагийн байгууллагаас өгсөн. Цагдаагийн байгууллагаас бидэнд мэдээлэл өгөхдөө цагдаагийн алба хаагчийн тавьсан шаардлагыг биелүүлээгүй, эсэргүүцэл үзүүлсэн, хамгаалалтын нэгдүгээр бүс рүү нэвтрэхийг завдсан учир иргэдийг "хэн" гэдгийг нь тогтоох, мэдүүлэг авахаар хуульд заасны дагуу түр саатуулсан гэдэг мэдээллийг өгсөн.

 ХЭҮК-оос мэдүүлэг авах явцад очиж ажилласан. Эдгээр иргэдийг баривчилж, цагдаагийн байгууллага руу хүргэхдээ хүч хэрэглэсэн байж болзошгүй нөхцөл байдал байгаа. Үүнд ЦЕГ-ын Дотоод хяналт шалгалтын хэлтсээс албаны шалгалт явуулж буй. Үзэл бодлоо илэрхийлсэн үйл ажиллагааг таслан зогсоохдоо хүч хэтрүүлэн хэрэглэсэн үйлдэлд дотоод албаны шалгалт явагдаж байгаа гэдэг мэдээллийг цагдаагийн байгууллага, ХЭҮК солилцоод явж байна" гэсэн юм.