Нийслэлийн Замын хөдөлгөөний төлөвлөлт, зохицуулалт, инженерчлэлийн газраас олгож буй QR код бүхий зөвшөөрлийг хэрхэн цагдаад шалгуулах талаар мэдээлж байна.

Тодруулбал, Улаанбаатар хот доторх автомашины хөдөлгөөнийг бууруулахын тулд 13 салбарын аж ахуйн нэгжийн албаны хэрэгцээний автомашинд QR код бүхий тусгай зөвшөөрлийг нийслэлийн Замын хөдөлгөөний төлөвлөлт, зохицуулалт, инженерчлэлийн газраас олгож буй юм. Түүнчлэн дээрх зөвшөөрөлтэй холбоотой асууж, тодруулах зүйлээ 1800-1200 тусгай дугаарын утаснаас лавлаж болох аж. 

Тусгай зөвшөөрлөөр хөдөлгөөнд оролцох үйл явцыг цагдаагийн байгууллагаас хянаж буй бөгөөд QR код бүхий зөвшөөрлийг цагдаад шалгуулахад анхаарах зүйлс:

• QR кодыг зорчих зөвшөөрөл авах 13 үүрэг чиглэлийн байгууллага хэвлэж авсан байх ёстой. Гэвч А4-өөр хэвлэн тээврийн хэрэгслийн салхины шилэн дээр байрлуулбал үзэгдэх орчинг хязгаарлаж буй тул A5-аар хэвлэж, жолоочийн эсрэг талд салхины шилний дээд буланд байрлуулна.
• Жолооч нар QR кодыг утсан дээрээ татах болон хэвлэсэн ч биедээ авч явах нь буруу юм. Учир нь энэ нь цагдаа болон иргэн хоорондын зай ойртож, эрсдэл үүсгэж буйг анхааруулж байна.
• Цагдаагийн албан хаагч шалгах төхөөрөмжөөр автомашины шилний гаднаас бар кодоор уншуулж тухайн тээврийн хэрэгслийн мэдээллийг авах юм.
• Зөвшөөрлөө авсан ч хуваарийн бус цагт зорчсон тээврийн хэрэгслийн хөдөлгөөнийг хориглох буюу зөвшөөрлийг цуцлуулах арга хэмжээ авна.
• Зөвшөөрлийг Нийслэлийн Замын хөдөлгөөний төлөвлөлт, зохицуулалт, инженерчлэлийн газраас авна.