Золгүй байдлаар гурвын гурван бяцхан охиноо нэг өдөр, нэг дор алдсан залуу аав ээжийг хүмүүс сайн мэднэ. Учир нь тэдний уй гашууг монголчууд хуваалцаж, хайртай үрсэд нь эмгэнэл илэрхийлж байсан хүн олон.

Тэгвэл залуус өөрсдийн гэсэн орон гэртэй болж хөөрхөн үрсээ угтан авахад бэлэн болжээ. Тодруулбал, залуу хосыг орон байртай болгох хандивын аяныг дарханчууд  санаачлан, нэг сарын хугацаатай өрнүүлсэн. Энэхүү хандивын аяны гол зорилго нь бяцхан үрсийг ээж аавдаа эргэн төрөөрөй гэж хүсээд, эргэн төрөхөд нь ая тухтай орон байртай угтахад оршсон гэдгийг аяныг зохион байгуулагчид онцолж байна.

Ингэснээр зохион байгуулагчид залуу хосод зориулагдан ард түмнээс цугласан 19 сая төгрөгөөр Орхон аймагт хоёр давхар амины орон сууц, газартай нь хамт худалдан авч өгчээ. Энэ шийдвэрийг залуус өөрсдөө гаргажээ. Тэд монголчуудын эртний уламжлалаар бид бууриа сэлгээд үзье гэж ийн шийдсэн тухайгаа хэлж байна.

Тиймээс залуус “Сайхан бүхнийг эндээ цогцлоож, энхрий үрсээ угтан авахад бид бэлэн. Мянга мянган монголчуудынхаа буян хишгийг өвөртлөн итгэлийг нь алдалгүй өнөр өтгөн айл болно оо. Ард түмний сайхан сэтгэлийн хандиваар авсан сайхан өргөөгөө цаашид тордон, улам гоё тохижуулна” хэмээн амлалаа.

“Байртай болгоё” хандивын аянд Дархан-Уул аймгийн 40 гаруй байгууллага, Монгол Улсын өнцөг булан бүрээс 100 гаруй иргэн нэгдэж, нийт 19сая төгрөг цугласнаар залуу хосыг ийн орон байртай болголоо. Та хоёртоо сайхан сайхныг хүсч, улам өнөр өтгөн айл болоорой гэж нийт монголчуудынхаа өмнөөс хүсье.