АНУ-ын шинэ Ерөнхийлөгч Доналд Трамп сонгуульд ялалт байгуулж, энэ оны нэгдүгээр сарын 20-нд тангаргаа өргөж, өөрийн кабинетаа бүрдүүлэн ажлаа эхэлснээс хойш тав дахь хүн албан тушаалаасаа огцорлоо. Тодруулбал, АНУ-ын Хөдөлмөрийн холбооны бага хурлын дарга Ричард Трумка Ерөнхийлөгчийн зөвлөх  байгууллага буюу “АНУ-ын аж үйлдвэрийн зөвлөл”-ийн гишүүнийхээ суудлаас огцроход хүрсэн байна. Түүний огцрох болсон шалтгаан нь энэ сарын 12-ны өдөр Виржиниа мужийн Чарлоттесвиллд гарсан үндсэрхэг үзэлт цагаан арьстнууд болон тэднийг эсэр­гүүцэгчдийн хооронд болсон мөргөлдөөнтэй холбоотой аж.

Тус мөргөлдөөний талаар Ерөнхийлөгч Д.Трамп өөрийн байр сууриа илэрхийлсэн хэдий ч, бөөрөнхийлсөн маягтай үг хэлсэн нь олны дургүйцлийг төрүүлээд байсан. Харин Ричард Трумка түүний хэлсэн үгийг “сохор үзэл, дотоодын терроризм”-ыг хүлээн зөвшөөрч буйгаа илэрхийлснээс ялгаагүй хэмээн шүүмжилсэн байна. Ингэснээр тэрбээр Д.Трампыг Ерөнхийлөгч болсноос хойш огцорсон зөвлөлийн тав дахь хүн болж байгаа юм.

Ричард Трумка мэдэгдэлдээ “Сохор үзэл, дотоодын терроризмыг хүлээн зөвшөөрч буй мэт аяглаж байгаа Ерөн­хий­лөгчийн төлөө ажиллаж чадахгүй нь” хэмээн дурьдаж, албан тушаалаасаа огцорч буйгаа зарласан байна. Тэгвэл мөн өдөр Ерөнхийлөгч Трампаас Чарлоттесвиллд гар­сан мөргөлдөөний талаар сэт­гүүлч асуухад “Хоёр тал хоёулаа л буруутай” гэж хариул­сан аж.

Үүнээс өмнө АНУ-ын Төрийн тэргүүний байгуулсан Аж үйлдвэрийн зөвлөлийн үйлдвэрчний эвлэлийн дарга Скотт Пол ч гэсэн өөрийн хүсэлтээр огцорч буйгаа мэдэгдсэн юм. Түүнчлэн, эм үйлдвэрлэлийн аварга компани “Мерск”-ийн гүйцэтгэх захирал Кэн Фрэзьер, спорт хувцас хэрэглэлийн “Under Armour”-ын СЕО Кэвин Планк, “Интел” компанийн СЕО Брайн Крзанич нар ч гэсэн огцрохоо мэдэгдээд байна. “Мерск”-ийн гүйцэтгэх захирал Кэн Фрэзьер Африк гаралтай америк хүн билээ.  

АНУ-ын Виржиниа мужийн Шарлоттесвиллд энэ сарын 12-нд үндсэрхэг үзэлт цагаан арьстнууд болон тэднийг эсэргүүцэгчдийн хооронд мөргөлдөөн гарсны улмаас нэг хүн амь үрэгдэж, хэдэн арван хүн гэмтэж бэртсэн юм. Мөргөлдөөн гарсны дараа Ерөнхийлөгч Д.Трамп анхны мэдэгдэлдээ үндсэрхэг үзэлт цагаан арьстнуудыг буруут­гахаас зайлсхийсэн нь олны эсэргүүцэлтэй тулгарсан юм.