Сүүлийн үед Төрийн ордонд урд хожид үзэгдээгүй олон зүйл болж буй. Өөрөөр хэлбэл,  парламентын гишүүдийн ёс суртахуунгүй үйлдэл хэрээс хэтэрч, иргэдийн нүд, чихийг бүлтийлгэж байгаа билээ. Хамгийн сүүлд гэхэд УИХ-ын гишүүн Д.Гантулга хүчингийн хэрэгт холбогдож, тэр хэрэгтээ тайлбар хийхдээ Төрийн ордонд “Би бандаашаа өмсөөд гарна” хэмээн хээв нэг хэлсэн үг нь одоог хүртэл олныг шуугиулсаар байна.

Энэхүү үйлдлээс болж “Залуухан гишүүд Монголын улстөрчдийн нэр хүндийг унагааж, Төрийн ордон, ард түмнээ доромжиллоо. Хэт залуу хүмүүсийг УИХ-д сонгохгүй байя” гэх яриа гарсан. Тэгвэл Үндсэн хуульд нэмэлт, өөрчлөлт оруулах асуудлыг хэлэлцэх үеэр шүүгчийн насыг нэмэх тухай яриа гарахад уг асуудалтай холбогдуулан Ерөнхийлөгчийн Тамгын газрын дарга З.Энхболд “Шүүгчийн насыг нэмэх гэж байгаа бол гишүүдийнхээ насыг ч нэмэх хэрэгтэй.

Тэгэхгүй бол 30 хүрээгүй УИХ-ын гишүүд чинь Төрийн ордонд бандааш яриад зогсож байна. Тиймээс гишүүнийхээ насыг нэмж болно шүү дээ. Тодорхой тохиолдол гарчихаад байна. Гэр бүл, ажил хэрэгтээ төлөвшсөн хүнийг нэр дэвшүүлдэг ч юм уу. Бид ердийн шүүгчийн насыг 30 болголоо. Тэгэхээр УИХ-ын гишүүнийхээ насыг нэмж болно. Ард түмэнд байгаа иргэдийн нийтийн хурал гээд баг, хороондоо уулздаг нэр дэвшүүлдэг байдлаас ажлаа эхлүүлбэл цааш явахгүй байх гэж бодож байна. Жилийн өмнө болсон УИХ-ын сонгуулиар урд хожид байгаагүй зүйл гарсан.

Одоо хүртэл 60 тэрбумын зарга нь дуусаагүй байна. Хуулийн байгууллага ард нь гарах л байх. 60 тэрбумаар бүрдсэн их хуралд Үндсэн хуулийг өөрчлөх эрх байна уу. Та нарт 57 кноп хангалттай байна. Ардчилсан нам оролцохгүй гэхэд бүгд суугаад юу дуртайгаа хийж болно. Тиймээс зүгээр л эргээд харчих хэрэгтэй. Хамаг булхай чинь Ерөнхийлөгчийн сонгуулийн өмнө ил боллоо. УИХ-ын сонгуулийн өмнө гурван минутын бичлэг олдсон. Одоо тоормосоо татаад эргэж харсан нь дээр болов уу гэж бодож байна” хэмээн саналаа хэлсэн юм.