Монгол Улсын мэдээлэл, харилцаа холбооны технологийн салбарын хүний нөөц, сургалт, судалгааг чадавхжүүлах хүрээнд БНСУ-ын КОЙКА байгууллагаас хэрэгжүүлсэн “ШУТИС-ийн Мэдээлэл, холбооны технологийн сургуулийн чадавхыг бэхжүүлэх” төсөл үр дүнгээ дүгнэх гэж байна.

БНСУ-ын Засгийн газрын 6 сая ам.долларын буцалтгүй тусламжаар 2019 онд эхэлсэн энэхүү төсөл нь өнгөрсөн 7 эилийн хугацаанд ШУТИС-ийн МХТС-ийн удирдлага, боловсрол, судалгааны чадавхыг бэхжүүлэх, сургалт, судалгааны орчныг сайжруулах үндсэн дөрвөн чиглэлд хэрэгжсэн байна. Тухайлбал, төслийн хүрээнд МХТС-д өндөр түвшний 10 сургалт, судалгааны лаборатори байгуулж, сургалтын болон судалгааны орчныг шинэ шатанд гаргажээ. Эдгээр лабораторийн зарим нь Монгол Улсад төдийгүй Азийн өндөр хөгжилтэй орнуудад ч ховор байдаг орчин үеийн тоног төхөөрөмж, технологиор бүтжээ. Өндөр бүтээмжтэй тооцооллын лабораторид хиймэл оюун, их өгөгдлийн олон төслийг хийж байгаа бол Радио давтамжийн лабораторийг улсын хэмжээний итгэмжлэгдсэн лаборатори болгох ажил төгсгөлийн шатанд оржээ.

Түүнчлэн Монгол-Солонгосын багш, судлаачдын хамтарсан 22 эрдэм шинжилгээний төсөл хэрэгжүүлж, WoS-ын SCIE индекстэй сэтгүүлүүдэд 30 гаруй өгүүлэл хэвлүүлсэн байна. Үүний сацуу бакалавр болон магистрын түвшний сургалтын 20 хөтөлбөрийг олон улсын шаардлагад нийцүүлэн шинэчилж, оюутнуудын суралцах, дадлага хийх, судалгаа шинжилгээ явуулах боломжийг өргөжүүлжээ. Мөн 15 багшийг БНСУ-д мэргэжил дээшлүүлэх сургалтад хамруулж, найман хичээлийн агуулгыг 100 хувь цахим хэлбэрээр явуулахаар хөгжүүлж, өнгөрсөн хичээлийн жилээс ашиглаж эхэлжээ.

ШУТИС-д хэрэгжиж буй энэхүү төсөл нь гүйцэтгэл, үр өгөөжөөр КОЙКА байгууллагад өндрөөр үнэлэгдсэн бөгөөд МХТС-ийн сургалт, судалгаа, инновацын чадавхыг бэхжүүлэхээс гадна Монгол Улсын мэдээлэл, харилцаа холбооны технологийн салбарын хөгжилд урт хугацааны бодит хөрөнгө оруулалт болсон гэж үзэж байна. Төслийг дүгнэх хаалтын арга хэмжээ есдүгээр сарын 11-ний өдөр болох юм байна.

Хаалтын арга хэмжээний үеэр төслийн хүрээнд бий болсон гол үр дүн, сургалт, судалгаа, лабораторийн орчны шинэчлэл болон цаашид эдгээр боломжийг Монгол Улсын мэдээлэл, харилцаа холбооны технологийн салбарын хөгжилд хэрхэн үр ашигтай ашиглах талаар танилцуулах ажээ.