Үндэсний их баяр наадмын бөхийн барилдаанд Монголын Үндэсний допингийн эсрэг байгууллага бүрэн бүрэлдэхүүнээрээ ажиллаж байгаа талаар мэдээлсэн.

Өмнө нь дөрөв давсан 32 бөхөөс сорьц авдаг байсан бол энэ жилээс эхлэн Үндэсний их баяр наадмынтухай хуульд заасны дагуу 21 аймаг, гурван дүүргийн баяр наадмын шөвгийн дөрвөн бөхөөс нийт 96 буюу 128 бөхийн сорьцыг ХБНГУ-ын итгэмжлэгдсэн лабораторид шинжлүүлж ажиллах тухай Монголын Үндэсний допингийн эсрэг байгууллагын Ерөнхий нарийн бичгийн дарга Н.Ариунзаяа ярьсан юм. Энэ жил Үндэсний их баяр наадмын тухай хуулиар аймаг болон түүнтэй адилтгах наадмын үндэсний бөхийн шөвгийн дөрвөн бөхөөс допингийн шинжилгээ авахаар хуульчилсан. Тодруулбал, Үндэсний их баяр наадмын тухай хуулийн шинэчилсэн найруулгыг 2022 онд баталсан.

Хуулийн 21.5 заалтад "Аймгийн баяр наадам, түүнтэй адилтгах баяр наадмын бөхийн барилдаанд шөвгийн дөрөвт үлдсэн бөхөөс допингийн шинжилгээг 2025 оны баяр наадмаас эхлэн авна" гэж заасан байдаг. Хэрэв шинжилгээ авахгүй бол тухайн аймаг дахь үндэсний бөхийн барилдаанд амжилт үзүүлсэн бөхийн цол чимэг баталгаажихгүй гэдгийг албаныхан мэдээлж буй. Ингэснээр 21 аймгаас гадна нийслэлийн Налайх, Багануур, Багахангай дүүргийн баяр наадмын үндэсний бөхийн барилдааны шөвгийн дөрөвт үлдсэн бөхчүүдийг допингийн шинжилгээнд хамруулна. Үүнээс гадна улсын баяр наадамд барилдсан бөхчүүдээс 2025 оны долдугаар сарын 12-нд допингийн шинжилгээ авч, Герман улс руу шинжилгээний дээжийг нэгтгэн явуулна гэдгийг Монголын үндэсний допингийн эсрэг байгууллагаас мэдээлсэн юм.