Баянгол дүүргийн иргэдийн Төлөөлөгчдийн Хурлын Дэд бүтэц, гэр хорооллын хөгжлийн хорооноос Нийслэлийн орон сууцны бодлогын газар, дүүргийн ЗДТГ-ын Төлөвлөлт, гүйцэтгэлийн удирдлагын хэлтэстэй хамтран дахин төлөвлөлтийн асуудлаар мэдээлэл солилцох уулзалтыг өнөөдөр /2025.01.17/ зохион байгууллаа.

Уулзалтад ИТХ-ын дарга П.Өлзийнаран, Дэд бүтэц, гэр хорооллын хөгжлийн хорооны дарга Б.Түмэндэлгэр, Дахин төлөвлөлтийн дэд хорооны дарга А.Есүхэй, Ү.Амартүвшин, дүүргийн Төлөвлөлт, гүйцэтгэлийн удирдлагын хэлтсийн дарга Г.Энхцэнгэл, 2-р хорооны Засаг дарга Д.Амартогтох, Нийслэлийн орон сууцны бодлогын газрын Захиргаа, санхүүгийн хэлтсийн дарга Ж.Болортуяа нар оролцов.

НИТХ-аас Нийслэлийн хэмжээнд гэр хорооллын газрыг дахин төлөвлөж барилгажуулах төслийн 26 байршил, 83 хэсэгчилсэн талбайг баталсан. Төслийн хүрээнд өнөөдрийн байдлаар 16 байршил, 41 хэсэгчилсэн талбайд 38 төсөл хэрэгжиж байна.

Баянгол дүүргийн хувьд 1 байршил 3 хэсэгчилсэн талбайд 3 төсөл хэрэгжүүлж буй. Нийт 1234 нэгж талбар газраас 126-г чөлөөлсөн, 1108 нэгж талбар газрыг чөлөөлөх шаардлагатай байгаа юм. Харин орон сууцны төлөвлөлтөд 12598 орон сууц багтсанаас 573-ыг ашиглалтад оруулаад байна.

ИТХ-ын дарга П.Өлзийнаран хэлэхдээ Нийслэлийн бодлого шийдвэрийг тууштай, тогтвортой дэмжиж байгаа бөгөөд бүх талын мэдээллийг урьдчилсан байдлаар авч байгаа нь бидний ажил цаашид үл ойлголцол, саад бэрхшээл багатай хэрэгжих үндэс болно гэв.