Зам, тээврийн сайд Б.Дэлгэрсайхан өчигдөр /2025.01.06/ "Тавантолгой төмөр зам" ХХК-ийн Гүйцэтгэх захирал Н.Будбаяртай тус компанийн 2025 оны гүйцэтгэлийн төлөвлөгөөнд гарын үсэг зурж, баталгаажууллаа.

"Тавантолгой төмөр зам" ХХК-ийн ирэх жилийн гүйцэтгэлийн төлөвлөгөөнд Засгийн газрын 2024-2028 оны үйл ажиллагааны хөтөлбөрт тусгасан ажлууд, тэр дундаа 14 мега төслийн нэгдүгээрт эрэмбэлэгдсэн Гашуунсухтайт-Ганцмодны боомтын хил дамнасан төмөр замын төслийг хэрэгжүүлэх ажлын талаар тусгасан.

Компанийн ирэх жилийн гүйцэтгэлийн төлөвлөгөөнд есөн зорилтын хүрээнд нийт 45 ажлыг төлөвлөн хэрэгжүүлэхээр шийдвэрлэснээс Гашуунсухайт-Ганцмод боомтын барилга угсралтын ажлыг эхлүүлэхтэй холбоотойгоор холбогдох ажлуудыг үе шаттай хэрэгжүүлэхээр болсон. Тодруулбал, барилга угсралтын ажлыг эхлүүлэхтэй холбоотой холбогдох зөвшөөрөл, газар чөлөөлөх, кемпийн бэлтгэл зэрэг ажлыг бүрэн хангаж, барилгын ажлыг гуравдугаар улиралд тодорхой хувь, хэмжээнд хүргэх талаар төлөвлөгөөнд тусгасан юм.

Зам тээврийн сайд Б.Дэлгэрсайхан Засгийн газрын мега төслийг хэрэгжүүлэхэд нийт алба хаагчид, инженер техникийн ажилчид харилцан уялдаатай хамтарч ажиллахыг уламжиллаа.