Манайд “Улс төр, бизнесийн бүлэглэл банк дампууруулж ашиг олдог” гэсэн ойлголт бий. Чухамдаа ийм шалтгаанаар дампуурсан гэх банкны нэр цөөнгүй дуулддаг. Зарим бодит жишээгээр энэ нь үнэний ортой байдаг.

“Анод” банк, “Зоос” банк, “Хадгаламж” банкууд дээр хэлсэн замаар дампуурсан байж болзошгүй гэгддэг. Олон жилийн өмнө дампуурсан эдгээр банкны өр одоо хүртэл төлөгдөлгүй “зээлдэгчид” нь завшсаар байгаа нэг жишээ энд байна. Хамгийн гол нь шүүх бүх шатаараа банкны өрийг барагдуулах шийдвэрийг гаргадаг. Харин ШШГЕГ-ын эрх бүхий албан тушаалтнууд шүүхийн шийдвэрийг дураараа өөрчилдөг болжээ.

“Анод” банк 2008 онд, “Зоос” банк 2009, “Хадгаламж” банк 2013 онд дампуурч татан буугдсан. Эдгээр банкны дампууралд “Олон овоот гоулд” ХХК бодитой “хувь нэмэр”-ээ оруулсан байдаг.

“Олон овоот гоулд” ХХК нь “Анод” банк, “Зоос” банк, “Хадгаламж” банкуудад 140 тэрбум төгрөгийн өртэй.

Үүнээс төрийн гурван байгууллагын авлага 123 тэрбум төгрөг байна. Тодруулбал, “Анод” банкнаас Монголбанк 19 тэрбум төгрөг, “Зоос” банкнаас Сангийн яам 58 тэрбум төгрөг, “Хадгаламж” банкнаас “Хадгаламжийн даатгалын корпорац” 45 тэрбум төгрөг авах ёстой.

Гэвч “Олон овоот гоулд” ХХК дээрх банкнуудаас авсан зээлээсээ нэг ч төгрөг төлөлгүй 20 жил болж байгаа аж.

Энэ хооронд бүх шатны шүүхээс төлбөрийг төлүүлэх шийдвэр гарсан ч гүйцэтгэлгүй 12 жил болж байна. Өөрөөр хэлбэл, “Анод” банк, “Зоос” банк, “Хадгаламж” банкны нэхэмжлэлтэй “Олон овоот гоулд” ХХК-иас авах зээлийн гэрээний авлагатай холбоотой 18 шүүхийн шийдвэр гарсан байдаг.

“Анод” банк дахь Банкны эрх хүлээн авагчийн нэхэмжлэлтэй 2011 оны арванхоёрдугаар сарын 19-ний “Олон овоот гоулд” ХХК, “Монгол газар” ХХК, “Иточу” корпорацын Улаанбаатар хот дахь төлөөлөгчийн газрын хариуцсан хэрэгт шүүгчийн 4 дугаартай шийдвэрээр “Олон овоот гоулд” ХХК-иас 2 561 264 032 төгрөг гаргуулан “Анод” банкинд олгох, хамтран хариуцагч “Иточу” корпорацын Улаанбаатар хот дахь төлөөлөгчийн газар болон “Монгол газар” ХХК нь зээлийн гэрээтэй холбоотой батлан даагчийн үүргээ “Олон овоот гоулд” ХХК-д шилжүүлж хариуцлагаас чөлөөлөгдсөн. Мөн 2012 оны нэгдүгээр сарын 31-ний “Олон овоот гоулд” ХХК, “Баярсгоулд” ХХК-ийн хариуцсан иргэний хэрэгт “...“Олон овоот гоулд” ХХК нь 125 065 334 төгрөг төлөх. “Олон овоот гоулд” ХХК-ийн ООГ/155 тоот гэрээний хавсралт 2-т заасан түүний эзэмшлийн лицензүүд, эд хөрөнгөөр дээрх гэрээний үүргийн гүйцэтгэлийг хангуулах” тухай шүүгчийн 220 дугаар захирамж, мөн өдөр “Анод” банкны Банкны эрх хүлээн авагчийн нэхэмжлэлтэй, “Санд” ХХК, “Олон овоот гоулд” ХХК, “Монгол газар” ХХК-ийн хариуцсан хэрэгт “...“Олон овоот гоулд” ХХК нь зээлийн гэрээний үүргийн гүйцэтгэлд 6 175 263 206 төгрөгийг төлөх. “Олон овоот гоулд” ХХК нь сайн дураараа биелүүлээгүй бол ООГ/155 тоот гэрээний дагуу барьцаалсан ашигт малтмалын 15273А, 15274А, 15275А, 15282А, 15283А, 5464А, хайгуулын 15276Х, 15277Х, 15278Х, 15279Х, 15280Х, 15281Х, 1528Х тоот лицензүүдийг албадан дуудлага худалдаагаар худалдаж, үүргийн гүйцэтгэлийг хангуулахыг НШГА-д даалгасугай” гэсэн 218 дугаартай шүүгчийн захирамж, 2012 оны зургадуугаар сарын 18-ны “Олон овоот гоулд” ХХК, 273 дугаартай шүүгчийн захирамжаар “Олон овоот гоулд” ХХК нь зээлийн гэрээний үүргийн гүйцэтгэлд 4 977 534 246.57 төгрөг гаргуулах, үүргийн гүйцэтгэлийг “Олон овоот гоулд” ХХК-ийн эзэмшлийн ашигт малтмалын болон хайгуулын лицензүүд, өмчлөлийн бусад эд хөрөнгөөр хангуулах тухай “Анод банк” ХХК дахь Банкны эрх хүлээн авагчаас гаргасан нэхэмжлэлийн шаардлагыг бүхэлд нь хүлээн зөвшөөрснийг баталсан. 2012 оны арванхоёрдугаар сарын 4-нд “Олон овоот гоулд” ХХК-ийн хариуцсан нэхэмжлэлд шүүгчийн 1996 дугаартай захирамжаар “...“Олон овоот гоулд” ХХК-иас 5 506 073 848 төгрөг гаргуулан “Анод” банкинд олгохоор, “Монгол газар” ХХК-ийн эзэмшлийн 1000 дугаартай ашигт малтмалын хайгуулын лиценз, “Сайхан оргил гоулд” ХХК-ийн эзэмшлийн 6630 дугаартай ашигт малтмалын хайгуулын лицензүүд болон “Олон овоот гоулд” ХХК-ийн 13 ширхэг лицензээр үүргийн гүйцэтгэл хангуулахаар шийдвэрлэсэн.

“Зоос” банк дахь Банкны эрх хүлээн авагчийн нэхэмжлэлд гарсан шүүхийн шийдвэрийн тухайд, 2012 оны нэгдүгээр сарын 24-нд “Эйч Эм-Эм”, “Олон овоот гоулд” ХХК-ийн хариуцсан нэхэмжлэлийг “Олон овоот гоулд” ХХК-иас 7 311 212 548 төгрөг гаргуулах, үүргийн гүйцэтгэлийг банк дундын барьцааны гэрээнд дурдсан ашиглалтын болон хайгуулын лиценз бүхий барьцааны зүйлээр хангуулахыг шүүгчийн 171 дугаартай захирамжаар, мөн өдөр “Монгол газар” ХХК, “Мэйжик сигналс” ХХК, “Олон овоот гоулд” ХХК-ийн хариуцсан нэхэмжлэлд шүүгчийн 173 дугаартай захирамжаар “...“Олон овоот гоулд” ХХК нь зээлийн гэрээний үүргийн гүйцэтгэлд 1 533 107.65 ам.доллар “Зоос банк” ХК дахь Банкны эрх хүлээн авагчид олгох, ООГ/155 тоот гэрээгээр барьцаалагдсан “Олон овоот гоулд” ХХК-ийн нэр дээрх хайгуулын болон ашиглалтын лиценз, тус компанийн өөрийн өмчлөлийн бусад эд хөрөнгө, тоног төхөөрөмжөөр үүргийн гүйцэтгэл хангуула, бас “Олон овоот гоулд” ХХК, “Монгол газар” ХХК, “Оргил говь” ХХК-ийн хариуцсан нэхэмжлэлд шүүгчийн 172 дугаар захирамжаар “...“Олон овоот гоулд” ХХК-иас 7 215 934 930.82 төгрөгийг бүрэн төлж барагдуулах, төлөөгүй тохиолдолд “Олон овоот гоулд” ХХК нь гэрээний дагуу барьцаалсан өөрийн эзэмшлийн ашигт малтмалын лицензүүдийг албадан дуудлага худалдаагаар худалдаж, үүргийн гүйцэтгэлийг хангуулахыг НШГА-нд даалгасугай” гэж шийдсэн. 2012 оны нэгдүгээр сарын 25-нд “Эм Жи Эйч” ХХК, “Олон овоот гоулд” ХХК-ийн хариуцсан нэхэмжлэлд шүүгчийн 183 дугаар захирамжаар “...“Олон овоот гоулд” ХХК зээлийн гэрээний үүргийн гүйцэтгэлд 9 704 308 167 төгрөгийг “Зоос банк” ХК дахь Банкны эрх хүлээн авагчид төлөх, “Олон овоот гоулд” ХХК шийдвэрийг сайн дураараа биелүүлэхгүй бол ООГ/155 тоот гэрээний дагуу барьцаалсан өөрийн эзэмшлийн лицензүүдийг албадан дуудлага худалдаагаар худалдаж, үүргийн гүйцэтгэлийг хангуулахыг НШГА-нд даалгасугай” гэж, “Говь сор” ХХК, “Жаст групп” ХХК, “Скай ком” ХХК, “Олон овоот гоулд” ХХК-ийг хариуцагчаар татсан хэрэгт шүүгчийн 182 дугаар захирамжаар “...“Олон овоот гоулд” ХХК нь зээлийн гэрээний үүргийн гүйцэтгэлд б1 165 013 784 төгрөгийг “Зоос банк” ХК дахь Банкны эрх хүлээн авагчид төлөх, “Олон овоот гоулд” ХХК шийдвэрийг сайн дураараа биелүүлэхгүй бол ООГ/155 тоот гэрээний дагуу барьцаалсан өөрийн эзэмшлийн лицензүүдийг албадан дуудлага худалдаагаар худалдаж, үүргийн гүйцэтгэлийг хангуулахыг НШГА-нд даалгасугай” гэж, мөн “Их үүсэл” ХХК, “Монгол цамхаг” ХХК, “Олон овоот гоулд” ХХК-ийн хариуцсан нэхэмжлэлд шүүгчийн 181 дугаартай захирамжаар “Олон овоот гоулд” ХХК-иас 4 510 446 429.50 төгрөгийг гаргуулж, “Зоос банк” ХК дахь Банкны эрх хүлээн авагчид олгох, “Олон овоот гоулд” ХХК-ийн 2010 оны арванхоёрдугаар сарын 8-ны өдөр “Зоос” банктай байгуулсан ООГ/155 тоот гэрэний хавсралт 2т заасан түүний эзэмшлийн лицензүүд, эд хөрөнгөөр дээрхзээлийн гэрээний үүргийн гүйцэтгэлийг хангуулахаар шийджээ. 2012 оны нэгдүгээр сарын 26-нд “Олон овоот гоулд” ХХК, “Монгол газар” ХХК-д хариуцуулсан нэхэмжлэлийг “...“Олон овоот гоулд” ХХК нь зээлийн гэрээний үүргийн гүйцэтгэлд 17 498 746 886.92 төгрөгийг “Зоос” банк дахь Банкны эрх хүлээн авагчид төлөх, “Олон овоот гоулд” ХХК нь шийдвэрийг сайн дураараа биелүүлэхгүй бол Барьцааны ООГ/155 тоот гэрээний дагуу барьцаалсан өөрийн эзэмшлийн лицензүүд, эзэмших эрхийг албадан дуудлага худалдаагаар худалдаж, үүргийн гүйцэтгэлийг хангуулахыг НШГА-нд даалгасугай” гэж шүүгийн 196 дугаартай захирамжаар шийдсэн байна. Тухайн өдөр “Олон овоот гоулд” ХХК-иас 5 854 820 860.29 төгрөгийг гаргуулах шүүгчийн 203 дугаартай захирамж, 3 422 268 054.70 төгрөгийг гаргуулах шүүгчийн 202 дугаартай захирамж тус тус гарсан байна. Түүнчлэн 2012 оны хоёрдугаар сарын 1-нд “Зоос банк” ХК дахь Банкны эрх хүлээн авагчийн нэхэмжлэлээр “Олон овоот гоулд” ХХК-иас 7 360 881 175.34 төгрөг гаргуулах шүүчгийн 219 дүгээр захирамж, 7 313 444 652.77 төгрөг гаргуулах шүүчгийн 231 дүгээр захирамж, мөн оны хоёрдугаар сарын 2-нд 2 858 956 712.33 төгрөг гаргуулах шүүгчийн 239 дүгээр захирамж тус тус гарсан байна.

Хамгийн сүүлд “Хадгаламж” банкны нэхэмжлэлтэй холбоотой Улсын Дээд шүүхийн 2016 оны зургадугаар сарын 28-ны “Хадгаламж банк” ХХК дахь Банкны эрх хүлээн авагчийн нэхэмжлэлтэй иргэний хэргийн тухай 001/ХТ2016/00853 дугаартай тогтоол гарчээ.

Үргэлжлэл бий...

ӨДӨР ТУТМЫН СОНИНУУДЫН “ЭРЭН СУРВАЛЖЛАГЧ” НЭГДЭЛ

Эх сурвалж:

“Зууны мэдээ” сонин - 2024 ОНЫ АРВАНХОЁРДУГААР САРЫН 5. ПҮРЭВ ГАРАГ. № 235 (7479)

Өдрийн сонин - 2024.12.05 ПҮРЭВ № 229 (7595)

Өнөөдөр сонин - 2024.12.05 ПҮРЭВ № 232 (8047)