Монголд аялал жуулчлал, зугаалгын улирал ирлээ. Он гарснаас хойш манай улсад 40 гаруй мянган жуулчин ирсэн мэдээлэл бий. Сүүлийн жилүүдэд Монгол Улс жилд нэг сая жуулчин хүлээн авах зорилт тавьж байгаа. Энэ зорилт биелэхэд ойрхон болсон. Өнгөрсөн онд л гэхэд  651,061 жуулчин ирж, дотоодын эдийн засагт 1.2 тэрбум ам.доллар буюу 4.4 их наяд төгрөгийн  орлого оруулсан судалгаа гарсан билээ. Засгийн газраас 2023-2025 оныг “Монголд зочлох жил” болгон зарлан, бодлого арга хэмжээ хэрэгжүүлж байна. Үүний үр дүн ч гарч ирэх жуулчдын тоо нэмэгдэж буй билээ.

Тодруулбал, ковидын үед алдагдалд орсон аялал жуулчлалын салбарыг сэргээх, ядахдаа хагас сая жуулчин хүлээж авах зорилго тавьж байлаа. Тэгвэл өнөөдөр жилд 700 мянга, цаашлаад нэг сая жуулчин хүлээж авах хүчин чадалтай болжээ.

Гадаадын жуулчин хүлээж авна гэдэг бол зөвхөн БОАЖЯ-ны бодлого, жуулчны хэдэн компанийн асуудал биш. Хүн бүр хичээх ажил. Тухайлбал, хувийн машинаараа өдөрт таксинд явж аж амьдарлаа залгуулдаг хүмүүст хамаатай. Гэтэл манай зарим жолооч такси үйлчилгээ үзүүлэхдээ гадаадын хүн харвал илүү мөнгө нэхэх, хэл амаар доромжлох асуудал гаргаж байгаа нь харамсалтай. Саяхан хувиараа таксинд явдаг нэг нөхөр Солонгос жуулчныг бидний ярьж заншсан Төв номын сангаас Зайсан хүргэж өгөхдөө 25 мянган төгрөг нэхэж байгаа бичлэг цахим орчинд цацагдсан. Бас болоогүй замын хөдөлгөөнд оролцож байхдаа бусдыг элдвээр харааж зүхээд л яваа харагдсан. Энэ бол буруу хандлага. Үүнийгээ бид засчихвал болох гээд байна. 

Бид  бүхэн нэг ч гэсэн жуулчныг   үнэн сэтгэлээсээ  хүндэтгэж харилцвал үр өгөөжөө өгнө шүү дээ. Тэд бол жирийн  хүмүүс, Монголыг маань маш сайхан орон гэж бодоод зориод  ирсэн юм. Ихэнх жуулчид баян биш байдаг, бидэн шиг л тав арван цаасаа хойш нь хийж байж, цаг заваа гаргаж байж ирж байгаа хүмүүс. Бүр Монголыг маань үзвэл энэ насны хэрэг нь бүтлээ гэх хүмүүс ч тэдний дунд бий. Яагаад гэвэл монголчууд амар тайван хүмүүс, тал нутгаар нь аялахад хамгийн таатай орон гэж бодож ирдэг юм билээ. Европоос ирсэн нэгэн хөгшин “Би хорт хавдар гэдэг өвчинтэй тэмцэж байгаа. Миний цорын ганц хүсэл бол хөх тэнгэрийн орон Монголыг үзэх. Энэ хүсэлдээ ч хүрлээ. Одоо би нүд анихад санаа зовох зүйлгүй” хэмээн хэлэхэд нүдэнд нулимс цийлгэнэж байв. Тэгэхээр бид нэг ч гэсэн жуулчинтай эелдэг сайхан харилцаж, хүндэтгэж чадвал түүний араас хоёр, гурав гээд Монголд хүмүүс нэмэгдэх нь гарцаагүй. Харин хахир муухай харилцаад, тэр нь олон нийтийн сүлжээгээр цацагдаад байвал Монголд ирэх бодлоо орхиж, аяллаа цуцлаад эхэлбэл яах билээ.

Уг нь монголчууд бид бахдам түүхтэй, ухаалаг, найрсаг зочломтгой ард түмэн шүү дээ. Тэгэхээр Монголыг маань зориод ирсэн жуулчдын урмыг хэзээ ч бүү хугалаарай. "Ганцхан" хувь хүн та, би  тэдний нүдэнд Монголчууд  гэж харагддаг, сэтгэлд нь Монгол Улсын нүүр царай болж үлддэгийг хэзээ ч бүү бүү мартаарай. Жуулчдад эерэг сэтгэгдэл, зөв хандлага  төрүүлье. Сүүлийн үед БНХАУ, ОХУ, БНСУ, Япон Улсын жуулчид Монголыг хамгийн сонирхож байгаа нь судалгаагаар нотлогдсон. Манай улсад ирж буй жуулчдын 80 орчим хувь нь эдгээр улсын иргэд байгаа юм. Тэр дундаа  эх орондоо нэр хүндтэй, алдар цуутай хүмүүс Монголыг сонирхох болсон гэдэг. Иймд Монгол хүн бүр хичээх юм бол сая сая, жуулчин хүлээн авч тэр хэрээр өндөр орлого олох боломж байна. Аялал жуулчлалын цаг ирлээ. Энэ жил их олон аймаг, сум ойн баяраа тэмдэглэнэ. Тэгэхээр ирсэн жуулчдад нутаг, нугынхаа наадмыг аятай тухтай үзүүлэх талаар хаа хаанаа бодолцъё.

Эх сурвалж: Монголын мэдээ сонин #ҮзэлБодол #Дугаарын60мөр

2024 оны тавдугаар сарын 28. Мягмар. №054 (5972)