Т.Эрдмаа

Монгол Улсад Улаанбаатар, Дархан зам гэж ажил нь дуусдаггүй нэг юм бий. Сүүлийн найман жилийн хугацаанд МАН үнэмлэхгүй олонхоор засагласан ч 200 гаруйхан км зам тавьж чадалгүй ноцолдсоор өдий хүрэв.

Анх 2017 онд Зам тээврийн сайд асан Д.Ганбат Улаанбаатар, Дарханы замд ажиллах үеэрээ стандарт шаардлага хангахгүй байгаа тус замыг дөрвөн эгнээтэй, нэгдүгээр зэрэглэлийн, цемент бетон хийцлэлтэй өндөр чанартай зам тавихаа хар толгойгоороо хариуцан амлаж байлаа.

Нийтдээ бараг найман жил үргэлжилсэн Улаанбаатар, Дарханы авто замын нийт төсөв 733.4 тэрбум төгрөг зарцуулжээ. Тэгвэл энэ оны төсөвт нэмээд 144.1 тэрбум төгрөгийн баталсан юм.

Өнгөрсөн  хугацаанд  уг  зам дээр гарсан  ослын улмаас 300 хүн зуурдаар нас барж, 200 гаруй гэр бүл хайртай дотнын хүмүүсээ алдаж өнчирсөн статистик бий. Тээврийн цагдаагийн албаны статистик мэдээллээс харвал  2018-2021 онд л гэхэд тус зам дээр 127 хүн нас баржээ. Үүнээс гадна  олон хүн  эрүүл мэнд, эд хөрөнгөөрөө хохирсон. Энэ бүгдийг  тооцвол нэлээд өндөр  тоо гарна.

Зуны амралт, аялал зугаалгын цаг эхэлж байна. Гэтэл гадаад, дотоодын  аялагч, амрагч нарын хамгийн их зорчдог зам нь  эрсдэл дагуулсаар.

Ингээд иргэдийн санал, шүүмжлэл гаргаж буй асуудлуудыг дор өгүүлье. Улаанбаатар, Дарханы зам дээрх учир нь үл мэдэгдэх аюулгүйн нэртэй жижиг тойргууд аюул дагуулж буйг иргэд хэлж буй юм. Тодруулбал, энэ яг ямар хэрэгтэй юм бол гэж гайхаад байх юм. Иймэрхүү тойрог   цацруулагч сум хийх ёстой.  Гэтэл зүгээр л шулуун  замаас нь ялгагдахгүй юм хийчихсэн. Шөнө гэрэлд цохиулсан машин шууд яваад  орохоор л байна. Тэр ч бүү хэл  өдөр явж байгаад харайлгаад орчихсон хүмүүс ч бий гэнэ. Яагаад гэвэл 50-60 км цагийн хурдтай явсан ч багтаад тойрох боломжгүй юм билээ.

Энэ тойрог зам угаасаа л ямар ч тооцоо  судалгаа байхгүй өндөр  эрсдэлтэй  болсон гэдэг нь илт байгаа юм. Бас нэг асуудал нь замын анхааруулах тэмдэг,  тэмдэглэл маш бүрхэг. Барьж дуусаагүй тул  нэг урсгалаа хаачихсан. Гэвч тэмдэг тэмдэглэгээ нь мэдэгдэхгүй, дутуу хийсэн  учраас урсгал сөрж ороход их эрсдэлтэй  хэмээн  иргэд хэлж байна. Бас зарим газраа эвдрээд эхэлжээ. Монгол Улсад замын стандарт алдагдсан,  шинээр баригдсан барилга, байгууламж замыг ашиглалтад хүлээж авдаг төрийн байгууллагын ажлаа хийж байгаа царай энэ.  Уг замаар зорчигчдын аюулгүй байдлыг хангасан зүйл алга. Улаанбаатар, Дарханы замтай эрх баригчид  олон жил ноцолдоод дуусгаж чадахгүй болохоор иргэд бухимдаж  удаа дараа шаардлага тавьсны эцэст санд мэнд нээсэн зам нь нэг иймэрхүү.

Ямар сайндаа л зарим иргэн олон нийтийн сүлжээнд бичлэг хийж тавих, сэрэмжлүүлэг болгон бичвэр оруулах билээ дээ. Тэгэхдээ  “Энэ замын аюулгүй байдлын талаар  яриад ч хэрэггүй.  Жолооч нар минь их анхааралтай явж байгаарай.  Төр засаг  бидний төлөө ажиллахаас өнгөрсөн” хэмээж буй юм.  Энэ зам бүрэн дүүрэн хэзээ дуусаж бүрэн ашиглалтад орох  юм бүү мэд. Бүрэн дүүрэн ашиглалтад орлоо гэхэд стандарт норм хангаж чадах уу үгүй юу гэдэг асуудал үүсэх нь одоогийн  нөхцөл байдлаас илт харагдаж байна. Иргэдээ бус эрх мэдэл албан тушаалаа боддог, улсаа биш уралдаж идэж уухаа сэтгэдэг  эрх баригчдын харалган бодол нэг иймэрхүү. Тэдний энэ авир ааш аяг иргэдийн нуруун дээр хагацал зовлон, эрүүл мэнд, эдийн засгийн хохирол болон бууж байна даа.

Эх сурвалж: Монголын мэдээ сонин #ҮзэлБодол #Дугаарын60мөр

2024 оны тавдугаар сарын 17. Баасан. №051 (5969)