Сүүлийн үест Ерөнхий боловсролын сургуулиуд сурагчдынхаа эцэг эхчүүдийн дунд олон төрлийн ажил арга хэмжээ зохион байгуулдаг болж. Зарим сургууль эцэг эхчүүдийнхээ дунд урлагийн үзлэг зохиож байхад нөгөө зарим нь спортын тэмцээн уралдаан зохион байгуулж байна. 

Юуны нь буруу байх билээ, хүүхдээ сургуульд өгөөд мартчихдаг, сайндаа л бага ангид сурдаг хүүхдээ үүдэн дээр нь хүргэж өгөөд, орой нь угтаж аваад, хүүхдийнхээ сурлага энэ тэрийн талаар ангийн багшаас нь хааяа асуучхаад үүнийгээ эцэг эх, халамжлан хүмүүжүүлэгчийн үүргээ биелүүлж байна гэж боддог цаг ард хоцорч сургууль багш нартай холбоотой байх, сургуулийн амьдралын гүнд орж, улмаар хүүхдийнхээ сурлага хүмүүжилд илүүтэй санаа тавихад эдгээр арга хэмжээ нөлөөлөхийг үгүйсгэхгүй.

Гадаад орны сургуулиуд эцэг эх хүүхдийг хамтад нь нэг баг болгоод уралдаан тэмцээн зохиодог, урлаг соёлын арга хэмжээ зохиодог туршлага бий. Ер нь гадныхан эцэг эх бол хүүхдийн найз нөхөр гэдэг ойлголт илүүтэй өгдөг, тэднийг хамтраад аав нь аав, ээж нь ээж гэхгүй, хүүхдээ хүүхэд гэлгүй  найзалж нөхөрлөж асуудлыг хамтран шийдвэрлэхэд энэ ажил арга хэмжээ чухал л даа. Тийм ч болохоор хүүхдийг нь багийн ахлагч болгодог. 

Манайд гэхэд л эцэг эхчүүдийг хүүхэд багачуул, сурагчдын сурлага хүмүүжилд сайнаар нөлөөлөх үр дүнтэй арга хэмжээ зохион байгуулдаг  сайн жишээ туршлага бишгүй нэг. “Шинэ үе” сургуулийн ангиуд сурагчдынхаа эцэг эхчүүдийг  хэдэн бүлэг болгоод 15 хоногт нэг удаа сурагчдын дунд соёл хүмүүжлийн арга хэмжээ зохиодог. Нэг бүлгийн 5-6 эцэг эх нийлээд нэг удаа  хотын хөдөлгөөний дүрмийн талаар тээврийн цагдаагийн ажилтныг аваачаад пресентешн үзүүлж, хүүхдүүдийг оролцуулсан үзүүлэх сургууль хийж байхад нөгөө эцэг эхчүүд нь үлгэрч туульч хүн аваачаад яриулж байх жишээний. Бас нэг нь хотын аялалд авч яваад музей үзмэр үзүүлэх. Энэ бүхнийг хийж зохион байгуулахын тулд эцэг эхчүүд багштай нь ярьж, хамтран ажилладаг, энэ хүрээндээ эцэг эхчүүд ч нэгддэг. Энэ бол үр дүнтэй бас сонирхолтой, хүүхэд багачуудад үр өгөөжтэй.

Харин сурагчид нь гэр гэртээ амарч байхад эцэг эхчүүд нь тэрүүхэндээ цуглаад тэмцээн уралдаан зохион хөгжилдөх нь  ямар үр өгөөжтэй юм бол. Яахав эцэг эхчүүд бие биенээ мэддэг болж сургуулиас зохиох элдэв төрлийн ажилд хожмоо хамтарч асуудал шийддэг, ажил зохион байгуулдаг болоход нэмэр тустай байж болох. 

Харамсалтай нь сурагчид, хүүхдүүдийн нь оролцоогүй зохион байгуулж байгаа насанд хүрэгчдийн ийм арга хэмжээ яг л насанд хүрэгчдийнхээ хэмжээнд үргэлжилж, тэмцээн уралдаан тэр арга хэмжээнийхээ дараа зоогийн газар, караокегээр үргэлжлэх нь нэг бус. Хожиж ялсандаа баяр хүргэж, танилцсаны баяр хэмээн архидан согтуурахаа байг гэхэд ганц нэг шар айраг ууж, дуулж хөгжилдөн үргэлжилнэ. Ийм арга хэмжээ хүүхдэд ямар нөлөө үзүүлдэг вэ. 

Энэ бүхнийг сургуулийн захиргаа, эцэг эхийн зөвлөлүүд анхааралдаа авч ямар арга хэмжээ зохион байгуулах вэ, тэр нь сургууль багш нарт, хүүхдэд ямар үр нөлөө, үлгэр дууриал болох зэргийг сайн тооцож, зохион байгуулж байвал уг нь зүгээрсэн.

Эх сурвалж: Монголын мэдээ сонин
2023 оны гуравдугаар сарын 28. Мягмар. №049, 050 (5777, 5778)