Коронавируст халдварыг илрүүлэхээр сүүлийн хоногт улсын хэмжээнд хийсэн шинжилгээний хариуг ХӨСҮТ-өөс танилцууллаа.

ХӨСҮТ-ийн Тандалт, судалгааны албаны дарга А.Амбасэлмаа "Нэгдүгээр сарын 26-ны өдөр улсын хэмжээнд 12703 хүнд коронавирусийн халдвар илрүүлэх шинжилгээ хийхэд 11 хүнээс халдвар илэрсэн.

Өмнөх батлагдсан тохиолдлын ойрын хавьтал буюу гэр бүлийн гишүүн 5 хүнээс халдвар илэрсэн. Наркологийн төв эмнэлэгт 2 тохиолдол бүртгэгдсэн. Сүхбаатар дүүргийн 1, 5 дугаар хороонд байрлах орон сууцанд өвчлөл гарсантай холбоотойгоор голомтын өргөжүүлсэн тандалтыг зохион байгуулахад хоёр хүнээс халдвар илэрлээ.

Улаанбаатараас Ховд аймаг руу явж байсан автобусны зорчигчдоос хоёр хүний шинжилгээнд халдвар илэрсэн.

Улсын хэмжээнд голомтлон гараад байгаа хэсэгт бүртгэгдсэн тохиолдлыг өссөн дүнгээр хэлбэл, 

Улаанбаатарт 836
Сэлэнгэ аймагт 217
Орхон аймагт 25
Дархан-Уул аймагт 45
Дорноговь аймагт 32
Говьсүмбэр аймагт 4
Архангай аймагт 3
Ховд -2

Сүүлийн 24 цагт 25 хүн эдгэрч гэртээ гарсан. 

Улсын хэмжээнд халдварын батлагдсан тохиолдол 1,667 болсон бол үүнээс 1,236 хүн эдгэрсэн байна. Эмчлэгдэж байгаа 418 хүний биеийн байдлыг үнэлбэл, маш хүнд 1, хүнд 3, хүндэвтэр 52, хөнгөн 362 байгаа" гэв.

Наркологийн төвд эмчлэгдэж байсан нэг хүн хөдөө явахаар шинжилгээ хийхэд халдвар илэрсэн. Үүнтэй холбоотойгоор Наркологийн төвд халдвар авсан иргэний ойрын хавьтал 17 хүн, эмч ажилчид 40 хүн гээд нийтдээ 70 хүнд шинжилгээ авч, түр хугацаагаар хөл хорио тавьж шинжилгээ хийж байна.

Нэг удаагийн коронавирусийн шинжилгээ өгөөд би эрүүл гэж бодож болохгүй. Улаанбаатараас Ховд руу автобусаар явсан хоёр тохиолдол батлагдсантай холбоотойгоор тухайн автобусанд явсан 41 хүнийг эхний ээлжинд тусгай үүргийн онгоцоор тээвэрлэсэн. Тэнд шинэ голомт үүсэх эрсдэлээс сэргийлж тусгай үүргийн онгоцоор тэднийг нийслэл рүү татсан. Өмнө нь Ховдод халдвар гарч байгаагүй учраас уг арга хэмжээг авсан.