Зургаан настай хүүхдээ машиндаа үлдээгээд, дэлгүүр явсан хойгуур нь аччихсан байсан. Бүр хүүхдийг нь буулгаад, ачаад явсан. Харин хүүхэд нь өөр газраа аав, ээж рүүгээ ярьж байж бие биеэ олж уулзсан гэх мэдээлэл, бичлэг өчигдөр сошиалаар гарсан билээ.

Тэгвэл уг асуудлаар Замын цагдаагийн газраас тайлбар хийсэн байна. Тайлбарт “2017 оны есдүгээр сарын 2-ны өдөр 100 айлын замд верна маркийн автомашины жолооч нь тээврийн хэрэгслээ зорчих хэсгийн нэгдүгээр эгнээнд дүрэм зөрчин байрлуулсан.   Тухайн автомашин нь 100 айлын замын хөдөлгөөнд саад болж,  ачаалал үүсгэж байсан тул уулзвар дээр ажиллаж байсан замын цагдаагийн алба хаагч автомашин дээр ирж шалгажээ.

Тэгэхэд  автомашин дотор  хамгаалагчгүй хүүхэд ганцаараа байсан бөгөөд  эцэг,  эх рүү нь холбогдох гэсэн боловч гар утсаа машиндаа орхиод явсан байсан байна. Түгжрэлийг арилгах хөдөлгөөнийг чөлөөтэй явуулахын тулд алба хаагч тээврийн хэрэгслийг зорчих хэсгийн нэгдүгээр эгнээнээс холдуулж,  автобусны буудал дээр байрлуулаад явжээ.  Үүний дараа хүүхэд нь машинаа түгжээд,  эцэг,  эхээ дуудахаар явсан байх хойгуур тухайн гудамж замд ачилтын үйл ажиллагаа явуулдаг “Бат-Зэв” ХХК-ийн  ачигч автомашин замын цагдаагийн алба хаагчийн зөвшөөрөлгүй тээврийн хэрэгслийг зөөж,  түр саатуулах байранд байрлуулжээ.

Дээрхи зөрчлийг гаргасан ачилтын компанид зөвшөөрөлгүй ачилт явуулахгүй байх, жолооч ачигч нарын харьцааны соёлыг сайжруулах дахин зөрчил гаргасан тохиолдолд гэрээг цуцлуулах талаар албан мэдэгдэл хүргүүллээ” хэмээжээ.