АНУ-ын Сангийн яам өчигдөр мэдэгдэл хийж, Хойд Солонгосын цөмийн зэвсгийн хөгжүүлэлтийг дэмжсэн гэх шалтгаанаар БНХАУ болон ОХУ-ын иргэн болон аж ахуй нэгжид эдийн засгийн хориг арга хэмжээ авч буйгаа зарлалаа. Тэд Пхеньянд шахалт үзүүлэх зорилгоор тус хоригийг авч байгаа аж. Гэвч, БНХАУ-ын тал уг үйл ажиллагааг хүлээн зөвшөөрөхгүй гэдгээ мэдэгдээд байгаа юм.

Хойд Солонгос тив алгасагч баллистик пуужингийн туршилт хийсэнтэй холбоотойгоор НҮБ-ын Аюулгүйн зөвлөл энэ сарын 5-ны өдрийн хуралдаанаар АНУ-ын талаас тавьсан саналыг хэлэлцэж, нийт гишүүдийн 100 хувийн саналаар Пхеньяны эсрэг авах хориг арга хэмжээгээ чангатгахаар шийдвэрлэсэн юм. Энэ шийдвэрийн хүрээнд НҮБ-ын гишүүн орнууд Хойд Солонгосын нүүрс, төмөр, төмрийн хүдэр, хар тугалга зэрэг ашигт малтмалын импортдоо цэг тавьж, тус улсын гадаад худалдааны банкны дансыг царцааж, тэнгисийн цэргийн хөлөг онгоцыг нь бүх улсын боомт руу орохыг хориглосон билээ.

Тухайн үед Хойд Солонгостой бусад улс орноос илүүтэй ойр байдаг ОХУ, БНХАУ-ын төлөөллүүд ч уг саналыг дэмжсэн байдаг.

Тэгвэл НҮБ-аас авсан дээрх арга хэмжээ Хойд Солонгосын эдийн засаг болоод цөмийн зэвсгийн хөгжүүлэлтэд тодорхой дарамт үзүүлсэн гэдгийг АНУ-ын Төрийн нарийн бичгийн дарга Рекс Тиллерсон мэдэгдсэн байна. Тэрбээр “Аюулгүйн зөвлөлийн гишүүдийн 100 хувийн саналаар дэмжсэн хориг арга хэмжээнээс хойш Хойд Солонгос баллистик пуужин харвах гэх мэтээр аливаа өдөөн хатгасан ажиллагаа явуулсангүй” гэжээ.

Тиймээс цаашид Хойд Солонгосыг ганцаардуулах, илүү их дарамт учруулахын тулд АНУ Хойд Солонгосын цөмийн зэвсгийн хөгжүүлэлтийг дэмжсэн гэх шалтгаанаар ОХУ, БНХАУ-ын иргэн, аж ахуй нэгжийн эсрэг эдийн засгийн хориг арга хэмжээ авч байгаа юм байна. Албаны эх сурвалжийн мэдээлснээр, тус хоригт зургаан иргэн, 10 аж ахуй нэгж хамаарч байгаа гэнэ. Тухайлбал, Хойд  Солонгосын компаниудтай бизнесийн харилцаатай Хятадын нэгэн компанийн Намиби улс дахь охин компанийн эсрэг хориг арга хэмжээ авчээ. Мөн Пхеньяны цөмийн болон пуужингийн хөтөлбөрийг санхүүжүүлдэг Хойд Солонгосын аж ахуй нэгжтэй бизнесийн харилцаатай Оросын нэгэн компани болон Умард Солонгост нефть нийлүүлдэг Оросын гурван иргэнийг хар дансанд оруулсан байна.
Хориг арга хэмжээнд өртсөн дээрх компани болон иргэдийн АНУ дахь дансыг хааж, хөрөнгийг битүүмжлэхээс гадна Америкийн компаниуд болон иргэдтэй бизнесийн харилцаа тогтоохыг хоригложээ.

Сангийн сайд Стивен Мнучин “цөмийн болоод баллистик пуужингийн хөгжүүлэлтийг дэмжсэн иргэнийг АНУ-ын санхүүгийн системээс тусгаарлах замаар Хойд Солонгост үзүүлэх шахалтаа чангатгана” гэж ярьжээ.

Нөгөөтэйгүүр, БНХАУ уг үйл ажиллагааг эсэргүүцэж буйгаа мэдэгдээд байгаа юм. Тэд Хятадын компаниудыг хавчихын тулд үнэхээр зөв алхам хийж буй эсэхийг нь нягталжээ.

Хойд Солонгос улс удаа дараа пуужингийн туршилт хийсэнтэй холбоотойгоор Вашингтон, Пхеньяны харилцаа хурцдаад байгаа юм. Энэ сарын эхээр АНУ-ын Ерөнхийлөгч Доналд Трамп Хойд Солонгосыг сүрдүүлсэн мэдэгдэл хийсний дараа Ким Жон Ун цэргийнхэндээ Гуамын арал руу “Хвасон 12” загварын дөрвөн ширхэг пуужинг онилох тушаал өгсөн билээ.