Энэ оны  БАФТА-аас өсөх ирээдүйтэй жүжигчин шагналыг хүртсэн Том Холланд “Spider-Man: Homecoming” киноны гол дүрийг бүтээсэн билээ. Тус кино өнгөрөгч долдугаар сард дэлхийн кино театруудын дэлгэцнээ нээлтээ хийж, тэр даруйдаа хит уран бүтээл болж чадсан юм. Киног найруулагч Жон Уоттс найруулж, Роберт Дауни Жуниор, Майкл Китон нар тогложээ. “Spider-Man: Homecoming” кино “Captain America: Civil War” киноны дараах үйл явдлаар өрнөх бөгөөд  Питер Паркер гэдэг жирийн нэгэн ахлах сургуулийн сурагч супер баатар болон хувирдаг билээ. Тэрбээр гэмт хэрэгтэй тэмцэхийн зэрэгцээ Нью-Йорк хотыг авардаг.  Хүүг амжилттай супер баатар болоход нь Тони Старк тусладаг. Гол дүрийн жүжигчин Том Холланд эдүгээ 21 настай. Гэсэн ч энэ онд тэрбээр гурван ч дэлгэцийн бүтээлд ажилласан юм. Ингээд түүний найруулагч Жон Уоттсын хамт “cinematoday.jp” сайтад өгсөн ярилцлагыг орчуулан хүргэе.

-“Spider-Man: Homecoming” кинонд  “Captain America: Civil War” киноны Питер Паркерын өөрийгөө  бичсэн бичлэгийг ашигласан байна лээ. Бичлэг хийхэд хөгжилтэй байв уу?

-Том Холланд: Найруулагчийн хэлэх үгийг сонсмооргүй байсан болохоор гоё байсан.

Жон Уоттс: Миний хувьд ч гэсэн амар байсан.  Түүнд камер өгөөд,  хаалгаа хаачихсан. Харин дараа нь хийсэн бичлэгийг нь үзсэн л дээ.

-Анхнаасаа л тэр бичлэгээр киноны үзэгдлийг эхлүүлэх санаатай байжээ?

Уоттс: Тийм ээ. Миний эхний санаануудын нэг нь энэ байсан. Томын инстаграмм хуудастаа нийтэлсэн үсэрч буй бичлэгүүдийг нь үзээд “Энэ шүү дээ. Питер Паркер ч гэсэн яг ийм хөдөлгөөн хийх ёстой” гэж бодсон юм. /инээв/

-Киноны ойр орчимд нь өндөр барилга байхгүй. Тиймээс хүн аалз дүүжлэгдэж, үсэрч чадахгүй байгаа тэр үзэгдэл их сонирхолтой санагдсан?

Том: Миний ч гэсэн дуртай хэсэг. Энэ удаагийн ярилцлагаараа дамжуулж, “Spider-Man: Homecoming” кино ямар онцгой бүтээл болохыг хэлмээр байна.  Кинонд зөвхөн хүн аалз Манхэттенд амьдарч буй тухай өгүүлээгүй.  Бидний өнөөдрийг хүртэл харж, төсөөлж ирсэн  хүн аалзаас огт өөр байдлаар харуулж чадсанаараа онцлог болсон. Үүнийг Жон ч сайн гаргаж ирсэн. Тэр үзэгдэл  яах аргагүй өнөөдрийг хүртэлх бидний харснаас өөр дүр байгаа. Хаанаас ч зүүгдэж, дүүжлэгдэж чадахгүй, бугуйнаасаа аалзны шүлс гаргаж, үсэрч чадахгүй. Тэр үзэгдлийн зураг авалт үнэхээр хөгжилтэй байсан шүү. Өндөр барилга байхгүй ч гэсэн түүнийг хүн аалз гэдгийг нь товойлгон харуулснаараа маш бүтээлч байж чадсан.

Уоттс: Энэ санааг дээр үеийн комиксоос авсан юм. Марвелын 237 дахь дугаар байх аа.

-Том хошин шогийн мэдрэмж сайтай юм билээ?

Том: Аав минь инээдмийн жүжигчин байсан. Алиа хошин зан миний цусанд байдаг юм болов уу. Гэхдээ олон гайхалтай санаанууд зохиолоос л урган гарч байсан. Зохиол сайн учраас түүнийг сонирхолтой байдлаар үзүүлэн жүжиглэхэд хялбар байлаа. Хүн аалзыг олон сонирхолтой газруудад  аваачсан болохоор зохиол дахь инээдмийн үзэгдэл аандаа л санаанаас урган гарч байсан. Би өмнө нь бүжигчнээр ажилладаг байсан. Тэр үеийн   хөдөлгөөнүүд дүрээ бүтээхэд минь тусалсан. Энэ бол зохиол сайн байсны л ач.

Уоттс: Том,  аливаа зүйлийг цагийг нь олж хийхдээ сайн юм билээ. Инээдэмтэй хэсгийг яг цагийг нь олж, харуулж чадаж байсан.

Том: Баярлалаа. Тэр бол яах аргагүй эцгээсээ өвлөсөн авьяас байх. Оройн хоолны ширээний ард эцгийнхээ дуулах сонирхолтой яриаг нь сонсч өссөн болохоор тэр юм болов уу.

-Зураг авалтын үеийн уур амьсгалын талаар яриач?

Уоттс: Үнэхээр ноцтой байсан. /инээв/

Том: Кристофер Ноланы кино шиг... /инээв/

Уоттс: Бас чимээ аниргүй. Хэн ч авиа гаргаж чадахгүй.

Том: /инээв/

Уоттс: Наргиан шүү. Зүгээр л хөгжилтэй байх гэсэн юм. Аль болох бүгдийг нь тохь тухтай байлгахыг л хичээлээ. Эрэгтэй жүжигчдийн харилцаа ч таатай байв. Кино багт Оскар хүртэж байсан жүжигчнээс эхлээд өмнө нь ямар ч кинонд тоглож байгаагүй шинэ жүжигчин хүртэлх янз бүрийн хүн багтсан. Тиймээс аль болох хүн бүрт л тав тухтай байхыг бодсон.

-Доналд Гловертэй хамтарч ажиллах ямар байв?

Том: Гайхалтай байсан. Энэ киноны бас нэг сонин зүйл нь түүний тайзны нэр Чайлдиш Ганбино байсныг огт мэдээгүй байсан явдал. Зураг авалт дууссаны дараа л мэдсэн. Чайлдиш Ганбиногийн дуунуудыг нь олон сонсч байсан. Гэхдээ уран бүтээлчийг нь нэг ч удаа харж байгаагүй юм. Тэгээд хайрлаж, хүндэлж явдаг уран бүтээлчтэйгээ уран бүтээл, дуу хөгжмийнх нь талаар нэг ч удаа ярилцаж чадаагүйдээ жаахан харамссан.

-Дараагийнх нь ангийг хийх бодол байна уу?

Уоттс: Тийм ээ, санаа бол маш их байна. Гэхдээ ярих боломжгүй.