БНХАУ-ын дарга Ши Жиньпин ОХУ-д айлчилж байна. Ингэснээр 2017 он гарснаас хойш хоёр улсын төрийн тэргүүнүүд гурав дахь удаагаа уулзаж буй нь энэ юм.

Сар хүрэхгүй хугацааны өмнө Ши, Путин нар Казахстаны нийслэл Астанад болж өнгөрсөн Шанхайн Хамтын Ажиллагааны Байгууллагын дээд хэмжээний уулзалтын үеэр уулзжээ. Мөн үүнээс өмнө тэд тавдугаар сард Бээжинд болсон “Нэг зам, Нэг бүс” төслийн форумын үеэр уулзсан юм. Германд болох Их 20-ын уулзалтыг зорих замдаа Ши Жиньпин хоёр өдөр Москвад саатах ажээ.  

Энэ удаагийн айлчлалын үеэр хөршүүд 10 тэрбум ам.долларын  дүнтэй хэд хэдэн хамтын ажиллагааны гэрээнд гарын үсэг зурахаар төлөвлөсөн байна.

Үүнд, Засгийн газар хоорондын болон хоёр орны компаниудын хоорондын гэрээ хэлцлүүд багтаж байна. Мөн дэлхийн улс төрийн тавцанд хэд хэдэн асуудлаар, тухайлбал Солонгосын хойгийн асуудал, Сирийн асуудлаар хамтын байр сууриа бататгах болно гэж албаны эх сурвалжууд мэдээлжээ.