Ус, цаг уурын үндэсний хүрээлэнгээс ихэнх нутгаар цасан шуурга шуурч, нойтон цас орох талаар иргэдэд сэрэмжлүүлэг хүргэж байгаа билээ.

Тэгвэл өчигдөр орсон цасны улмаас иргэд төөрч, улмаар осгож нас барсан байна. Тодруулбал, өчигдөр Увс, Завхан, Хөвсгөл, Баян-Өлгий, Говь-Алтай, Хэнтий, Баянхонгор, Ховд аймгийн нутгаар ихээхэн хэмжээний цас орсны улмаас иргэд төөрч алга болсон, осгож нас баржээ.

Тухайлбал, Завхан аймгийн Баянхайрхан сумаас Нөмрөг сум орохоор Портер загварын ачааны автомашинтай хоёр иргэн энэ сарын 20-ны өдрийн 03:00 цагт гараад Нөмрөг сумаас 33 км-т “Агуйтын дөрөлж” гэдэг газар машин цасанд суусан тул иргэн 62 настай Х татах машин олохоор сум руу яваад сураггүй болсон тухай дуудлага энэ сарын 21-нд Онцгой байдлын газарт иржээ. Дуудлага тус өдрийн 14:15 цагт ирсэн бөгөөд дуудлагын дагуу эрэн хайх ажиллагаа зохион байгуулсан байна. Эрэн хайх ажиллагааны дүнд тус сумын төвөөс 15 км-т “Сант толгойн-Ар” гэдэг газраас осгож нас барсан байдалтай байсныг олж цогцсыг Цагдаагийн байгууллагад шилжүүлсэн аж.

Мөн Говь-Алтай аймгийн Бигэр сумын Буудай багийн “Ямаан-Ус” гэдэг газар өвөлжиж байсан малчин Ц малдаа яваад сураггүй болсон дуудлагаар эрэн хайх ажиллагаа зохион байгуулж, энэ сарын 22-ны өглөөний 04:00 цагийн орчим эсэн мэнд олж, ар гэрт нь хүлээлгэн өгчээ.

Цасан шуурганы улмаас малд явсан иргэд сураггүй болсон тохиолдлууд олон гарсан байна. Одоогийн байдлаар сураггүй болсон иргэдийг Онцгой байдлын алба хаагчид үргэлжлүүлэн хайж байгаа аж. тухайлбал,

Увс аймгийн Улаангом сумын Баянхайрхан багийн “Хэрцийн-Овоо” гэдэг газраас иргэн , Р нар өчигдрийн 08:00 цагт мал тууж авчирахаар яваад сураггүй болсон гэнэ. Мөн аймгийн Тариалан сумын Бургастай багийн “Шар бүрдийн хөдөө” гэдэг газар иргэн Я-гийн 10-15 насны гурван хүүхэд 22:30 цагт малтайгаа шуурганд уруудаж төөрсөн аж. Өмнөговь сумын Холбоо багийн “Орломт толгой” гэдэг газар иргэн З  амаржих гэж байна гэсэн дуудлагаар явсан сум дундын эмнэлгийн их эмч Д, жолооч А нар Трайл загварын суудлын автомашинтай яваад сураггүй болжээ. Эдгээр иргэдийг одоогийн байдлаар олоогүй бөгөөд эрлийн ажлыг үргэлжлүүлж байгаа юм байна.