Манай улсад хүүхэд, залуучуудын дунд аюул дэгдээж буй зүйл бол хар тамхи, мансууруулах бодис юм. Тэр дундаа хар тамхи, сэтгэцэд нөлөөлөх эм, мансууруулах бодис хэрэглэгчдийн тоо өсөж байгааг мэргэжилтнүүд сануулж буй. Энэ талаар өнгөрсөн хоёрдугаар сард болсон Нийслэлийн Эрүүгийн хэргийн давж заалдах шатны шүүхийн тайлан хурлын үеэр хар тамхины хэрэг 2015 онтой харьцуулахад,  57.2 хувиар өссөн хэмээн мэдээлсэн.

Мөн Сэтгэцийн эрүүл мэндийн үндэсний төвийн Төрөлжсөн мэргэжлийн амбулаторид хэвтэн эмчлүүлэгчдийн дунд хар тамхинаас шалтгаалсан өвчтөнүүдийн тоо эрс нэмэгдсэн тухай мэдээлж байсан юм. Түүнчлэн хар тамхи хэрэглэгчдийн нас ч залуужиж байгаа аж. Энэ сарын 9-нд гэхэд найман настай О, 12 настай О нар орцонд газ үнэртэн, мансуурч байгаад баригдсан байна. Уг хэргийг Баянзүрх дүүргийн цагдаагийн II хэлтэс шалгаж байгаа аж. Тиймээс бага насны хүүхдүүддээ анхаарал, халамж тавихыг цагдаагийн газраас зөвлөж байна.