МУИС-ийн оюутнууд сургуулийн удирдлага, захирлуудаа хууль бус суурь хураамжаа зогсоохыг шаардана сургуулийнхаа I байрны өмнө жагслаа. МУИС-ийн удирдлагууд 2013 оноос эхлэн оюутнуудаасаа суурь хураамж нэрийдлээр 224-336 мянган төгрөг авах болжээ. Өөрөөр хэлбэл, МУИС-ийн оюутнууд жил бүр сургалтын төлбөрөө хоёр төрлөөр төлдөг байна. Тодруулбал, сургалтын төлбөр болон суурь  хураамжийн төлбөрөө хийсэн тохиолдолд хичээлд суух эрх нь үүсдэг аж. Тиймээс тус сургуулийн оюутнууд энэхүү хууль бус үйлдлээ зогсоох шаардах хуудсыг удаа дараа сургуулийнхаа удирдлагуудад өгч байсан хэдий ч ямар ч тайлбар өгч байгаагүй гэнэ.

Энэ талаар МУИС-ийн оюутны холбоо, конгрессийн тэргүүн Б.Хосбаатар “Манай сургууль жил бүр оюутнуудаас суурь хураамж гэж төлбөр авдаг. Тодруулбал, бакалаврын зэрэгт суралцаж байгаа оюутнаас 224 мянган төгрөг, магистр, докторын оюутнаас 336 мянган төгрөгийг авдаг. Бид жил бүр сургуулийн удирдлагуудад хандаж суурь хураамжаа зогсоох талаар шаардлага хүргүүлж байсан. Бидний шаардлагыг огт хүлээж авдаггүй байсан. Харин энэ жил суурь хураамжийн мөнгийг юунд зарцуулдаг тухайгаа бичсэн тайланг өгсөн. Тэр тайлан мэдээлэлд тусгагдсанаар бидний төлсөн суурь хураамж анги, танхимын урсгал болон их засвар, номын сангийн бүрдүүлэлт, захиргааны зардал, хангамж үйлчилгээний ажилтны цалинд зарцуулагддаг гэсэн.

Дээд боловсролын тухай хуульд суралцагчаас суралцах төрлөөс гадна мөнгө авахыг хориглоно гэж заасан байдаг. Аудитын газраас ч оюутнуудаас суурь хураамжийг авах нь хууль бус үйлдэл учраас энэхүү ажлаа зогсоо гэсэн дүгнэлт гарсан байгаа. Ийм зөвлөмж гарчихаад байхад энэ асуудлаа шийдэхгүй байна. Тиймээс бид жагсаал зохион байгуулж байна. Хэрвээ жагсаалын дараа асуудлаа шийдэхгүй бол бид өлсгөлөн зарлахад ч бэлэн байна” гэв. Тус сургуульд бакалаврын 16 мянга, магистр, докторын 4000 оюутан суралцдаг байна. Жагсаалын үеэр оюутнуудтай уулзаж байр суурийг нь сонссон юм.

Б.Билэгт: Суурь хураамжид 600-700 мянган төгрөг өгсөн

/МУИС-ийн оюутан/

-Манай сургууль оюутнуудаасаа төлбөрөөс гадна суурь хураамжийн төлбөрийг заавал авдаг. Энэ нь сургалтын төлбөрөөс гадна хууль бусаар мөнгө аваад ашиглаж байгаа гэсэн үг. Би гурван жил сурч байгаа. Суурь хураамжид 600-700 мянган төгрөг өгсөн байгаа юм. Зөвхөн суурь хураамждаа гэсэн үг шүү дээ. Сургуулийн захиргаанаас тайларлахдаа бид нараас авсан суурь хураамжийн мөнгөө оюутнуудын тав тухтай байдал, сургалтын орчинг бүрдүүлэхэд зориулж байгаа гэдэг. Гэвч амьдрал дээр энэ нь ерөөсөө харагддаггүй. Сургалтын орчин, чанар муу байдаг. Жишээлбэл, онлайнаар хичээл сонгодог систем байдаг л даа. Гэхдээ тэр нь ажилладаггүй. Энэ мэтчилэн энгийн жишээнээс харахад,  тэр мөнгө  бидний төлөө зарцуулагдаж байгаа зүйл алга. Миний жилд 2.3-2.5 сая төгрөг төлдөг байгаа. Төлбөртөө суурь хураамжийн үнэ орсон байдаг. Гэхдээ төлбөрөө төлөхдөө суурь хураамж, сургалтын төлбөр гэж тусдаа тушаадаг. Энэ хоёрыг хоёуланг нь төлж байж хичээл сонгох эрх үүсдэг.

Б.Бадамханд: Лекцийн танхимд нь өвөл куртик, бээлийтэйгээ сууж байна

/МУИС-ийн оюутан/

-Суурь хураамжийн мөнгийг оюутнуудынхаа төлөө зарцуулсан гэсэн зүйл ажиглагдахгүй байгаа. Манай оюутны холбооноос суурь хураамжийн мөнгийг сургуулийн захиргаа ийм зүйлд зарцуулдаг гэж бидэнд танилцуулсан. Тэдний хэлснээр тэр мөнгийг бид нараас авах ёсгүй юм билээ. Харин улсын төсвөөс бүрдүүлэх ёстой гэдгийг бид мэддэггүй байсан. ер нь сургуулийн урсгал зардал болон цэвэрлэгч нарын цалинд зарцуулдаг гэсэн. Энэ мөнгийг аваад дансанд байршуулаад хүүгийн хувааж иддэг гэсэн ойлголт авсан. Үүнийг эсэргүүцэж байгаа. Манай сургуулийн анги, танхимууд хүйтэн байдаг. Ялангуяа сургуулийн долдугаар байр их хүйтэн. Лекцийн танхимд нь өвөл куртик, бээлийгээ өмсөж суухаас өөр аргагүй байдаг. Засвар хийсэн ч нэг их сайн болдоггүй. Ер нь оюутнуудынхаа төлөө ажилдаггүй.

М.Мөнхнайрамдал: Хуучин номын сан нь дүүрэхгүй байхад шинэ номын сан барина гэдэг бол инээдтэй асуудал

/МУИС-ийн оюутан/

-Би дунджаар жилд 2.8 сая төгрөг төлдөг. Бараг гурван сая гэсэн үг шүү дээ. Зарим сургуулиуд жилд 1.6-1.8 төлдөг юм билээ. Гэтэл би нэг семистерт 1.4 мянган төгрөг төлж байна. Гэтэл дээрээс нь нэмээд семистер болгонд 112 мянган төгрөг авч байгаа юм. Энэ төлбөрүүд юунд зарцуулагддаг вэ гэдэг их сонин л доо. Би энэ талаар судалж үзсэн. Шинэ номын сан, заал барихад зарцуулсан байгаа юм. Үнэнийг хэлэхэд манай сургуульд номын сан дутагддаггүй. Итгэхэд хэцүү байгаа бол МУИС-ийн ямар ч сургуульд 1-5 өдөр очоод үзэхэд харагдана. Суудлынх нь 30-40 хувь нь дүүрсэн байдаг юм. Ийм байхад дахиж номын сан барина гэж байна. Тэрнийхээ мөнгийг бид нараас авч байгаад л гомдолтой байна. Номын сан нэмэх нь зөв л дөө. Гэхдээ хуучин номын сан нь дүүрэхгүй байхад шинэ номын сан барина гэдэг бол инээдтэй асуудал.