Монголын тэшүүрийн холбооноос жил бүр уламжлал болгон зохион байгуулдаг “Гүйлтийн тэшүүрийн насанд хүрэгчдийн улсын аварга шалгаруулах тэмцээн” хоёр өдрийн турш Хандгайт дахь мөсөн гулгуурийн талбайд боллоо. Тэмцээнд гурван нийгэмлэг, спорт хорооны нийт 40 гаруй тамирчин хурд хүч авхаалж самбаагаа сорин өрсөлдөж,  ЗХЖШ-ын “Алдар” нийгэмлэгийн  тамирчид багаараа аваргаллаа. Тодруулбал, тэмцээнд эмэгтэйчүүдийн  500, 1000, 1500, 3000 метрийн зайн уралдааны нийлбэр дүнгээр “Алдар” спорт хорооны тамирчин ОУХМ, олимпийн аварга Б.Сумъяа түрүүлж, алтан медаль зүүсэн бол мөн спорт хорооны тамирчин ОУХМ Д.Дэлгэрмаа мөнгө, Орхон аймгийн тамирчин Б.Уянга хүрэл медалийг тус тус хүртсэн юм.

Харин эрэгтэйчүүдийн 1000, 1500, 3000, 5000 метрийн зайд “Алдар” спорт хорооны тамирчин ОУХМ Г.Ууганбаатар аваргын алтан медаль хүртсэн бол ОУХМ Я.Зоригтбаатар мөнгө, Д.Гочоосүрэн хүрэл медалийг тус тус зүүлээ. Ийнхүү Д.Энхбаяр дасгалжуулагчтай “Алдар” нийгэмлэгийн тэшүүрчид Улсын аварга шалгаруулах тэмцээнд  багаараа аваргалсан юм. Тэмцээний үеэр “Алдар” спорт хорооны дарга Г.Өсөхбаяр“Алдар спорт хороонд 15 төрлөөр шигшээ багаа бүрдүүлж, Монгол Улсын спортын салбарт тэргүүлж байна.

Өвлийн спортын тэшүүрийн багт улсын шилдэг тамирчид багтдаг юм. Бид тамирчдаа ахуй хангамж, тэмцээн уралдаанд оролцох нөхцөл боломж, бэлтгэл сургуулилтад бүхий л талаас нь дэмжлэг үзүүлж ажиллахыг хичээдэг. Тамирчид маань тэшүүрийн төрлөөр өндөр амжилттай явж байна. Тухайлбал, Монголын спортын түүхэнд анх удаа Б.Сумъяа залуучуудын олимпийн аварга болсон.  Энэ бол яах аргагүй тэшүүрийн түүхэнд тодоор бичигдэх амжилт шүү дээ. 

Алдар спорт хорооноос өвлийн цана, тэшүүрийн төрлийг хөгжүүлэх, тамирчдынхаа бэлтгэл сургуулилтыг хангах үүднээс Тавантолгойн цэргийн амралтын баазад тэшүүрийн талбай байгуулах, цанын уралдах талбайг янзлах төсөл хөтөлбөр боловсруулаад танилцуулсан байгаа. Батлан хамгаалах яам, ЗХЖШ-ын удирдлагууд ч дэмжиж байгаа. Эл төсөл биеллээ олвол зөвхөн Алдар спорт хороо бус, Монгол Улсын өвлийн спортын хөгжил, амжилтыг ахиулсан материаллаг бааз болох юм” гэв. Харин “Алдар” спорт хорооны тамирчин ОУХМ, олимпийн аварга Б.Сумъяа “Насанд хүрэгчдийн гүйлтийн тэшүүрийн улсын аварга болсондоо баяртай байна. Хоёрдахь удаагаа оролцож байна.

Энэ жил нийлбэр дүнгээр улсын аварга боллоо. Маш их баярлаж байна. Ирэх сард Японд  Азийн тоглолт, гуравдугаар сард Канадын олон улсын тэмцээн болно. Түүнд оролцож дэлхийн цомын эрх биелүүлэх зорилготойгоор бэлтгэл сургуулилтаа хийж байна даа. Өрсөлдөгчид нэлээд хүчтэй байлаа. Зөв тактикаар зөв уралдсаны дүнд түрүүллээ. Багшдаа маш их баярлалаа. Баярласандаа нулимс гарах нь ээ” гэсэн юм.