“Эргэх холбоотой, хариуцлагатай  манлайлал“ ерөнхий  сэдвийн  дор  болж байгаа 47 дахь удаагийн чуулга  уулзалт  Швейцарийн  Давос хотод энэ сарын 17-ны өдөр эхэлсэн. Анх төр засаг болоод бизнесийнхний яриа хэлэлцээ хийх  талбар  болгон  1971 онд  үүсгэн байгуулж байсан тус эдийн засгийн чуулганы өнгөрсөн  46  жилийн  хугацаанд хэлэлцсэн  сэдвүүд нь улс  төрийн бус,  харин санхүү эдийн засгийн хямрал, үнийн уналт, эрчим хүчний эх үүсвэрүүд, худалдааны  саад тотгорууд  гэх мэт олон улсын харилцаан дахь эдийн засгийн асуудлууд  зонхилж  иржээ. 

 

Харин энэ жил чөлөөт худалдааг үл дэмжихээ илэрхийлдэг Дональд Трамп АНУ-ын Ерөнхийлөгчөөр  сонгогдсон, Их Британи Европын Холбооны эгнээнээс гарах болсон, Франц, Германд  удахгүй бүх нийтийн  сонгууль болох гэж  байгаа зэрэгтэй холбоотойгоор  хэлэлцэх сэдвүүд нь  улам бүр өргөжиж байна. Тэгвэл чуулганы үеэр БНХАУ-ын дарга Си Зиньпины тавьсан илтгэл олон улсын анхаарлыг ихээр татлаа.

 

Тэрбээр илтгэлийнхээ үеэр цөмийн зэвсгийг халж, эдүгээ хадгалагдаж буй зэвсгүүдийг ч устгахыг дэлхий нийтэд хандан уриалав. Си “Цөмийн зэвсэггүй дэлхийг байгуулахыг төлөө цөмийн зэвсгийг бүхэлд нь хориглож, тодорхой хугацаанд устгах ёстой” гэж хэлсэн байна. Мөн хүчирхэг улс гүрнүүдийн эрх тэгш харилцаанд үндэслэсэн олон улсын засаглалын тогтолцоог бий болгохыг санал болгож,  “Бид нэг улс, аливаа олон улсын дүрмээс татгалзах ёстой” гэдгийг уриалжээ.

 

Мөн дээр нь “Улс орнууд нэг нэгийнхээ үндсэн эрх ашгийг хүндэтгэх ёстой. Том гүрэн өөрийн ашиг сонирхлоо бусад улс оронд тулгаж болохгүй. Жижиг улс гүрэнтэй эрх тэгш орших хэрэгтэй” хэмээсэн байна. Швейцарын Давос хотод дөрвөн өдрийн турш үргэлжлэх чуулганд оролцож буй Си Зиньпин энэ сарын 17-ны өдөр зохион байгуулагдсан Давосын ерөнхий хуралдаанд анх удаагаа оролцож илтгэл тавьсан.

 

Тэрбээр энэ үеэр өнгөрсөн сарын АНУ-ын Ерөнхийлөгчийн сонгуульд Д.Трамп ялалт байгуулсантай холбоотойгоор АНУ-ын дэлхий дахинд гүйцэтгэх үүрэгт санаа зовниж буйгаа илэрхийлээд амжсан юм. Хэдийгээр Си дарга Д.Трампын нэрийг дурьдаагүй боловч, АНУ-ын шинэ Ерөнхийлөгчийн үзүүлж байгаа бодлого, үйлдэлд хариу өгөх зорилготой нь илэрхий байлаа. Өнгөрсөн жилийн турш өрнөсөн сонгуулийн сурталчилгааны үеэр Трамп нь Хятадыг “валютын луйварчин” хэмээн цоллож, Хятадын импортын бараанд 45 хувийн гаалийн татвар ногдуулахаа амлаж, Америкийн эдийн засгийн доройтолд Хятадыг буруутгаж байв.

 

Харин Си Зиньпин илтгэлдээ өөрийн зах зээлд гадаадын компаниудын нэвтрэх боломжийг улам сайжруулахаа амлан, Хятад улс юанийг зохиомлоор үнэгүйдүүлж, валютын дайн хийх санаагүй гэдгээ хэлжээ. Мөн худалдааны дайнд хоёр тал хоёул хохирогч болох аюултай гэжээ. Глобалчлалаас зугтах гэсэн ямар ч оролдлого бүтэлтэй болохгүйг тэр мөн онцолсон байна. Тэгвэл зарим шинжээчид Давосын чуулганд тавьсан Си Зиньпиний илтгэл өнөөдөр тангаргаа өргөх Д.Трампын тэргүүлэх АНУ-аас дэлхий нийтийг тэргүүлэх үүргийг булаах зорилготой байсан гэж дүгнэж байлаа.