АН-ын дарга О.Цогтгэрэл цаг үеийн асуудлаар байр сууриа илэрхийллээ.

-Намын шинэчилсэн бүртгэл асуудал дагуулж эхэлсэн.   Энэ талаар байр сууриа илэрхийлэхгүй юу?

-Ардчилсан намын шинэчилсэн бүртгэл, дүрмийн өөрчлөлттэй холбоотой дотоод шинэчлэлийн ажлууд явагдаж байгаа. Онцгойлон хэлэхэд, Ардчилсан нам гэдэг байгууллага дотоод шинэчлэлийн ажил хийж байгаа бус ардчиллыг дэмжигчид бүгд үзэл санааны хувьд нэгдэж ажиллахыг урьж байгаа үйл явц юм. Ардчилсан нам уламжлалаа дээдэлдэг шинэчлэлийг эрхэмлэдэг улс төрийн хүчин байна. Бид иргэдийн мэдээллийг СЕХ-оос авсан. Хууль бус зүйл биш. Харин иргэд өөрсдийнхөө мэдээллийг ил болгоод байсан учраас түр хугацаанд зохицуулалт хийсэн.

-Ардчилсан нам Засгийн газарт хариуцлага тооцох асуудлаа хөндөх байх гэсэн хүлээлт бий. Энэ долоо хоногт Эрчим хүчний сайд Б.Чойжилсүрэнд өгсөн 30 хоногийн хугацаа дуусч байгаа. Ардчилсан нам ямар шаардлага, байр суурьтай байгаа вэ?

-Ардчилсан намын зүгээс намрын чуулганы төгсгөлөөр Засгийн газрын үйл ажиллагаа шаардлага хангахгүй байна. Бид төрөө цомхон болгох ёстой, үр ашигтай, бүтээмжтэй болгох ёстой гэдгийг нөгөө талдаа дэд сайд гэдэг данхайсан бүтцийг халах ёстой эсэх бөгөөс Засгийн газарт хариуцлага тооцох асуудлыг өргөн барина гэдгээ мэдэгдсэн. Засгийн газрыг огцруулах хэмжээнээс дээш тооны гарын үзэг цуглуулсан байгаа. Тэгэхээр бидний зарчмын шаардлагууд хэвээр байгаа гэж ойлгож болно. Хаврын чуулганы эхэнд эрх баригчид болоод Засгийн газраас ямар нэгэн арга хэмжээ авахгүй бол тавьсан зарчмын шаардлага хэвээр байгаа шүү гэдгийг хэлье. Морин жил гарч байгаа учраас өнгөрсөн Могой жилд юу болж өнгөрөв, ямар өөрчлөлт шинэчлэлийг хийв гэдэгт дүгнэлт хийх нь зүйтэй. Монгол Улсын эдийн засаг, иргэдийн амьдрал уруудсан, бодит орлого нь буурсан. Нөгөө талдаа улс орны авлигажилт хэрээс хэтэрсэн. Үүнийг нь олон улсын байгууллага зарлаж, баталгаажуулсан ийм нэг жил болж өнгөрлөө.

-АН хаврын чуулганы хугацаанд ямар зарчимтай ажиллах вэ?

-Авлига гэдэгт хэн нэгэн улс төрч, улс төрийн хүчнийг онилж хэлж байгаа зүйл биш. Сүүлийн 10 жилд Монгол Улс дэлхийд авлигын индексээр 50 байр ухарсан байна. Сүүлийн нэг жилийн хугацаанд 10 байраар хойш ухарсан байна. Үүний цаана засаглалын асуудал,  төрийн өмчийн асуудал, шүүх, шударга ёсны асуудал гэх мэт олон зүйлийн нийлбэр гэж дүгнэхээс өөр аргагүй юм. Тэгэхээр бид үүнтэй холбоотойгоор зөвхөн асуудлыг шүүмжлэх биш, Ардчилсан намыг бүлэг дээр тодорхой шийдэл гаргасан бүтээлч зүйлсийг Хаврын чуулганаар хэлэлцүүлэхээр бэлтгэж байна. Эдийн засгийн эрх чөлөөний тухай хуулийн хэлэлцүүлгүүдийг хийгээд явж байна. Авлигатай холбоотойгоор Төрийн болон албаны тухай хуульд томоохон өөрчлөлт оруулахаар ажиллаж байна. Дур зоргоороо нууцад авдаг хэм хэмжээг хязгаарлах, ил тод болгох асуудлыг тусгасан хуулийн нэмэлт өөрчлөлтийг Засгийн газарт өргөн барихад бэлэн болж байна. Өөрөөр хэлбэл системийн авлигыг суурь сууриар нь өөрчлөх шаардлагатай гэж бид үзэж байна. Тиймээс зөвхөн шүүмжлэх биш бодит шийдэл гаргаж ажиллаж байна.

Эх сурвалж: “Зууны мэдээ” сонин

2026 ОНЫ ХОЁРДУГААР САРЫН 27. БААСАН ГАРАГ. № 37 (7779)

Хуурамч мэдээлэл хаа сайгүй тархах болсон энэ үед баримттай, эх сурвалжтай, үнэн бодитой мэдээллийг “Зууны мэдээ” сониноос аваарай.

Үнэн мэдээллийг хамтдаа хамгаалцгаая.

Бие даасан сэтгүүл зүйг дэмжин "Зууны мэдээ" захиалаарай. www.zuuniimedee.mn